Shillong, Rymphang 15: Ka Khasi Student Union (KSU) Mawkyrwat Circle kala pynpaw ka jingpyrshah halor ka jingthmu ban rah noh ia ka Ophis Border Area Development (BAD) Officer ba don ha Mawkyrwat sha kiwei ki District.
Ia kane ka jingpyrshah ka KSU kala leit ban buh daka dorkhas ha ophis Director ka tnat Border Area Department (BAD).
Lyngba ka dorkhas, ka KSU Mawkyrwat Circle kala pyntip ba kala ioh iaka jingtip naki nongshong shnong ba ka don ka jingthmu naka liang ka Sorkar Jylla ban rah noh ia ka ophis Border Area Development Officer sha kiwei ki District.
“Ka KSU ka pyrshah jur halor kane ka jingthmu naba ngi tip jan 50% eiei ki shnong kiba hap hapoh ka ka thain Mawkyrwat ki dei ki shnong ki bym da jngai na khappud jongka Ri Bangladesh. Kine ki thain bad ki nongshongshnong baroh shikatta ki ioh shibun ki jingmyntoi na kane ka ophis” ong ka dorkhas.
Ka dorkhas ka pynpaw ba watla kan don ka jingkylla ia mynta ha kano kano ka bynta haba iadei bad ki Border Area Development Programmes/Skhim hynrei ka seng ka khmih lynti ba kan dang iai long hi ka jingmyntoi haki snem bad ki por ban wan.
Kala seng kala ong ba ka jingdon jong kane ka ophis ka la long ka jingmyntoi shikatdei eh iaki paidbah bad ki samla pule hapoh ka thain kiba dang ioh ia ka Border Area Scholarship bad ka jingdon kane ka ophis kan sa nang ai jingmyntoi shuh shuh haba iadei bad ka roi ka por lem bad kiwei kiwei ki bynta haka thain.
“Kawei kaba ngi dei ban kynmaw ka long ba ka jingwan kane ka ophis ha Mawkyrwat ka dei ka jingangnud, ka jingthrang bad ka jingdawa jongki paidbah ka thain Mawkyrwat naduh ba la ioh iaka South West Khasi Hills District ha u snem 2012” la ong.
 Mawkyrwat Circle kala pynpaw ka jingpyrshah halor ka jingthmu ban rah noh ia ka Ophis Border Area Development (BAD) Officer ba don ha Mawkyrwat sha kiwei ki District.){kind=link}