Pyrshah ka HITO ban iasoi MoU bad ka Karnataka ha ka kam ri sniang bad ri syiar

Shillong, Kyllalyngkot 19: Ka Hynñiewtrep Integrated Territorial Organization (HITO) hynne ka sngi U Blei, kala pyntip ba kala phah da ka jingthoh sha u Myntri Rangbah ka jylla Conrad K Sangma ba pyrshah jur ia ka jingthmu iasoi ia ka Memorandum of Understanding (MoU) bad ka Karnataka Cooperative Society ha kaba iadei bad ka kam ri sniang bad ri syiar.

Katkum ka shithi kaba la phah da u Secretary ka HITO Wanbun Dkhar bad u Vice President Shaniah Nongrum, kila ong, “Ngi pyrshah ia kane ka jingthmu namar ba kam shym long ha ka lynti kaba khuid ba suba, ka jingbym don ka jingiasyllok bad ban pdiang ia ka bha ka miat jong ki paidbah ka jylla na ka bynta ki snem kiban wan”.

Ka seng ka sngewkhia halor ka jingbym don ka jingiasyllok bad ki paidbah bad ka rai ban iaid shakhmat bad ka jingsoi iaka MOU ka long khlem ka jingdon bynta lang jong u paidbah ne ban sngap ia ka sur ka jongki, kaba dei ka jingiuhroit ia ka hok jong ka jingsynshar paidbah kaba ktah ruh ia ka kamai kajih bad ia ka jingdon jingem.

“Ngi sngewkhia ruh ha kaba iadei bad ki kyndon jong ka MoU, namar ym shym la iakren hapoh ka iingdorbar thawaiñ ka jylla bad ia kiba kum kine ki mat kiba kongsan dei ban khmih bniah, ban iatai sani bad ban don ia ka jingiasngewthuh jingmut ban pynthikna ia ka jingdon ia ka jingkitkhlieh bad ka khuid ka suba ha ka rukom treikam. Ka jingbym don ka jingshai ha kaba iadei bad kane ka jingiateh kular, ka pynmih ia ki jingkylli kiba kongsan shaphang katei ka jingthmu jong ka sorkar. Ki nongshong shnong ka Meghalaya ki don ia ka hok ban ioh ia ki jingtip bad ka jingpynthikna ba la buh hakhmat eh ia ka bha ka miat jongki halor ki jingmyntoi jong kiba nabar” ong ka HITO haka shithi.

Ka HITO kala kyntu ia u Myntri Rangbah ka jylla ba kino kino ki jingleh kidei ban iaid katkum ka riti synshar paidbah bad ka jingiaid lait ia ka bha ka miat jong u paidbah kan buh kylla ha ka jingma ia ka jingshniah kaba ula ioh kum u nongialam.