Pyrshah ka AMPSTA ia ka jingthmu ka Sorkar ban pynduh noh ia ka kam Nonghikai Deficit

Shillong, Naitung 08: Ka All Primary School Teachers’ Association (AMPSTA) ka la pynpaw ia ka jingpyrshah pyrshah ia kano kano ka jingthmu ban pynduh noh ia ki kam nonghikai Deficit bala dep mang (Deficit Sanctioned Posts).

Ia kane ka jingpyrshah ka AMPSTA kala pynpaw lyngba ka dorkhas bala aiti sha u Myntri ka tnat pule puthi u Rakkam A Sangma ha ka 7 tarik Naitung.

Ka AMPSTA ba la ïalam da u General Secretary Bah FC Shullai ka la pynpaw ïa ka jingsngewkhia halor ka Meghalaya Education Grant (MEG) bad ki mat kiba ktah ïa ki nonghikai.

“Ha ka jaka ban pynduh noh ia kine ki kam, ngi kyntu ia ka Sorkar ba kan pynneh bad pyndap ia ki kam kum ki nonghikai Deficit” ong u Bah Shullai.

U Bah Shullai u la ong ba ka Association ka la pynpaw ia ka jingsngewkhia ha kaba iadei bad ka jingpynbteng ia ki kam nonghikai Deficit ba bat da ki nonghikai Deficit ba mynta ba kin ym shah ktah hynrei hadien ba la shongthait pat, yn pynkylla noh hapoh ka MEG.

U la pyntip ba u Myntri ka tnat pule puthi u la pynshai ba lada ki Management Committee ki skul ki aiti lut ia ki jingdon jingem sha ka Sorkar, ia ki kam ba la mang yn pynkylla noh sha ki kam Sorkar bad ki nonghikai kin long ki nongtrei Sorkar. Hynrei lada ki nongpyniaid kim aiti lut ia ki jingdon jingem, ki nonghikai kiba la don lypa kin dang ioh tulop kum ki Deficit hynrei hadien ba ki la shongthait ia katei ka kam yn sa pynkylla noh hapoh ka MEG.

“Kane ka la buh jingeh shibun ia ka Association ha kaba ngi kyntu jur ia ka Sorkar ban pynmih ia ki jingbthah kiba shai bad pynthikna ia ka jingshngain ka kam bad ka jingbteng jong ka jingshakri na ka bynta baroh ki nonghikai Deficit kiba mynta bad kiba hadien” u la ong.

U Bah Shullai u la pynpaw ruh haba pdiang bad sngewnguh ïa ka jingthmu jong ka Sorkar ban pynbha ïa ka rukom hikai, ka Association ka pyrshah jur ruh ïa ki kyndon kiba duna ka jingpynshai, ka jinglong hok bad ka jingkitkhlieh.

U la pynpaw ia ki katto katne ki jingeh ba kongsan jong ka Association kiba kynthup ia ki kyndon ne ki jingbthah ki bym shai na ka bynta ka jingpynbha katkum ka jingtreikam ki lah ban pynmih ia ka jingbym iaryngkat na ka bynta ki skul kiba duna ka jingdon jingem, ka jingai bor ba pura sha ki SMC ne ki GB khlem ka jingpeit bniah bad ka jingkitkhlieh ka lah ban wanrah ia ka jingpyndonkam bakla ia ka bor, ka jingpynslem ban pyndap iaki kam ba thylli jong ki nonghikai, ka jingslem ban thung nonghikai ha ki sobjek ki ktien Garo bad Khasi, ka jingbym shai ha ka contributed provident fund (CPF) ba la thep ha ka State Bank of India Laitumkhrah Branch bad ki hukum ba pynmih ka Sorkar khlem ka jingiasyllok.

“Da kaba shim ia kine ki jingeh, ngi kyntu ia ka Sorkar ban ai ia ki kyndon kiba shai bad kiba batai bniah ia ki kyndon na ka bynta ka jingai pisa katkum ka jingtreikam, ban pynbha ia ki lad jingkitkhlieh ban pynbeit ia ka bor jong ki SMC ne ki GB bad ban iada na ka jingpyndonkam bakla ia ki bor, ban pynthikna ia ki lad jingiada ban iada ia ki hok bad ka jingshngain kam jong ki nonghikai Deficat” u la ong.

Nalor kane ka AMPSTA ka la iakren ruh halor ka jingiateh kular hapdeng ka tnat pule puthi bad ka Mother’s Union, Tura ha kaba ki la pynpaw ia ka jingsngewkhia bad jingbym iahap jingmut kaba jur ha kaba u Myntri ka tnat pule puthi u la pyntip ba ka Sorkar ka la shim khia ia kane ka kam bad kan ap ia ka rai jong u Myntri Rangbah ha shwa ban iaid shakhmat.

Kala kyntu ia ka Sorkar ba kam dei ban leh klet ia ki jingshisha kiba don haki skul bad hapdeng ki nonghikai. “Ki polisi ba la shna khlem da iamir jingmut naduh tynrai kin wanrah tang ia ki jingeh kiba kham jur” kala ong.

“Ngim pyrshah ia ki jingpynkylla, watla katta dei ban iamir jingmut bha bad dei ban iada ia ka hok jong ki nonghikai. Ngi kyrmen ba ka Sorkar kan pynbeit kloi ia ki jingeh jong ngi ban lait na kano kano ka jingeh bad ka dei bad ban pynthikna ia ka rukom hikai kaba hok, kaba shai ha ka rukom hikai baroh kawei” u la ong.