Shillong, Jylliew 29: U National President ka National Peoples’ Party bad Myntri Rangbah ka Jylla Conrad K Sangma, ula pynpaw ia ka jingpyrshah kaba jur ia ka Uniform Civil Code (UCC) haba kren da kaba shai ba kane ka dei kaba iaid pyrshah ia ka jingdon bad jingburom ka Ri ia ki Jaidbynriew bapher bapher.
Haba pynpaw ba um pat iohi satia ia kiei kiba don ha kane ka UCC Bill, u Conrad ula ong “Ka bor jong ka Ri India ka shong ha ka jingdon jong ki riti dustur bapher bapher jong ki Nongshongshnong ha ka”.
Une u Nongialam ka NPP ula kren halor ka jingkongsan ban pynneh pynsah ia ki riti dustur bad ki jinglong nala tynrai ba pher tem jong ka thain Shatei Lam Mihngi. Ula ai nuksa ia ka jingai jait Kmie ha Meghalaya, kaba dei ka mat ba kongsan ha ka riti ka durtur bad ka jingithuh jong ka Jaidbynriew.
“Kano kano ka jingpynkylla ka ban wan na ka jingpyntreikam ia ka UCC kan sa pyniap noh ia ka riti ka dustur ba kan hiar pateng la pateng” ula ong haba iakren bad ki nongthoh khubor hynne ka sngi Thohdieng.
“Khlem da iohi ia kiei ki mat ba don ha ka Draft, kan long kaba eh ban batai bniah ia ka hynrei kumba nga ong, na kaei kaba baroh ki iohi, ngi kiba shim jait n aka kmie, kum ka nuksa, bad kane ka dei ka bor jong ngi bad kane ka dei ka riti ka dustur jong ngi” ula bynrap.
U Conrad ula ban jur ba baroh ki Jylla ka thain Shatei Lam Mihngi ki don iala ki jong ki riti dustur ba pher tam kiba dei ia kaban burom bad ban tynkai. Ula pynpaw ruh ba ka NPP kan ieng ban iakhun ha kaban iada ia ka riti dustur jong ki Jaidbynriew ka Thain, ki bym kwah satia ban iapein da lei lei ruh.
“Ka NPP kum ka Political party ka sngewthuh ba kan (UCC) sa wanrah ia ki jingpynkylla. Ka thain Shatei Lam Mihngi baroh kawei ka don ia ki riti dustur kiba pher bha na kiwei bad kumjuh ruh ia ka imlang sahlang..namar kata, ngi kwah ba kine kin neh beit kumba ki long bad ngim kwah ba (UCC) kan ktah ia ki”.
U Myntri Rangbah ula pynpaw sngew ba donkam ban bishar bha ia ki kyntien bad ki mat jong ka UCC Bill lada ka Sorkar Pdeng ka wanrah. Hynrei, ula ong ba tang ka jingmut ruh kala iaid pyrshah ia ka jingkam ba ka India ka dei ka Ri ba don ia ki Jaidbynriew bapher bapher kaba dei ka thymmei jong ka bor jong ka.
Ula kular ban a NPP kan iai kut jingmut ban iada ia ka riti dustur bad jinglong tynrai jong ki jaidbynriew ka thain Shatei Lam Mihngi bad ban peit thuh bha ia kiei kiei kiba jia ba man kiba don jingiadei bad ka Uniform Civil Code.
Pule ruh: Kem ki Pulit ia u runar ba pynjulor ia ki ATM ban sei pisa tuh
 haba kren da kaba shai ba kane ka dei kaba iaid pyrshah ia ka jingdon bad jingburom ka Ri ia ki Jaidbynriew bapher bapher.){kind=link}