“Nga dang shu bam doh ksew bad I kurim mynta dang arbnai eiei”: Sanbor
Shillong, Nohprah 06 : U MLA ka BJP na Shillong South Bah Sanbor Shullai ha ka sngi Thohdieng, ula pynpaw ia ka jing pyrshah kaba jur ia ka rai jong ka Sorkar BJP ba ialam da u Himanta Biswa Sarma, ban khang bam doh masi ha ki jaka paidbah.
Haba kren sha ki nongthoh khubor, u Bah Sanbor ula ong ba ha kano kano ka bynta jong ka pyrthei lane hapoh ka Riti Synshar ka Ri India, kam shym la don ka kyndon ne ain ba pyrrkhing ne khang ban bam ia kano kano ka jait doh.
“Haba phi leit shangkai sha kylleng ki ri ka Pyrthei, Bangkok, Malaysia, Indonesia, Europe bad dewbah Asia, ki bam wat ia u bsein, ka khnai, ki khniang, ka nianglartham ruh hynrei kam ju don ka jingpyrrkhing. Balei ba ki (Sorkar Assam) pyrrkhing ban bam doh masi. Nga pyrshah jur ia kane ka rai” ula ong.
Haba pynpaw ba hangne ha Meghalaya, ka dei ka mon u paidbah, u Bah Sanbor ula ong ba arbnai mynshuwa ula bam ia u doh ksew lem bad ka kurim.
“Ngi bam doh ksew. Nga ju bam doh ksew ha ka por ba nga dang khynnah. Mynta ruh dang arbnai eiei, u paralok ula phah doh ksew bad nga bam bha jai bad ka kurim. Yn leh aiu?”.
Haba khein ia ka rai ka Sorkar Assam ba kam long kaba bha, une u MLA ka BJP ula ong “Balei ba shu khang kynsan kynsan?. Ka dei ka mon jong phi la phi kwah bam doh bsein lane phi kwah ban bam doh masi.”.
U Bah Sanbor ula kular ba yn ym shah satia da lei lei ruh ia kum kine ki jingleh donbor ba kan jia ha Meghalaya.
“Ngan ieng skhem ha ka nongrim, hangne kan ym jia satia. Katba u Bah Sanbor u dang im, ngan ym khang satia. Kane ka dei ka Jylla ba laitluid. Ngi lah ban bam doh bsein, masi, nianglartham, khniang ne kino kino kiba ngi kwah. Ka Khristmas kala wan, bam lut ia kiei kiei, ka Khristmas bad snem thymmai kala wan. To ngin ia lehkmen. Nga ai khublei Khristmas bad snem thymmai ba kmen ia baroh” ula ong.
Haba kylli, u MLA ka BJP ula ong “Nga don hangne mynta kum u BJP Sanbor. Ka rukom treikam BJP jong nga ka dei kaba pher. Ha Assam, ka rukom treikam ka iapher. Hangne ka dei ka BJP Sanbor”.
Ha kajuh ka por, u Bah Sanbor u pyntip ba un sa thoh sha ka Sorkar Pdeng bad ka Sorkar Assam halor kane ka kam.
“Nga la dep pynkhreh ban phah ia ka khubor sha ka Sorkar Pdeng. Ia ka copy ngan sa phah sha u CM ka Assam Himanta Biswa Sarma ba ngi sngewsih ba ngi hap ban leh ia kine kiei kiei. Ngi don ia ka ain ban pyrrkhing ia ki nongleh bymman hynrei halor ka bam ka dih, kam dei ban don ka jingpyrrkhing” ula ong.
