Imphal, Lber 01: Ki MLA jongka Kuki Zomi Hmar kila pynpaw ia ka jingbynniaw halor ka Resolution kaba la mynjur da ka ïingdorbar thawaiñ ka Manipur kaba thmu ban pynduh noh ia ka Tripartite Agreement for Suspension of Operations (SoO) bad ki Kuki National Organisation (KNO) & United People’s Front (UPF).
“Ngi ki MLA jong ka Kuki-Zomi-Hmar ngi pynrem jur bad pynpaw shai kdar ba ngi pyrshah jur ia kane ka Resolution kaba noh shilliang kaba mih na ka jingleh shilliang khmat, kaba shah liang bad ka jingisih iaka jaidbynriew ka jong ngi, kaba pyni shai kdar ia ka jingnoh shilliang halor kane ka mat” la pynpaw ki 10 ngut ki MLA lyngba ka kyrwoh khubor.
Kila pynpaw ba ka jingmynjur ia ka Resolution kadei ban pynthohbria ia ka KNO & UPF bad ban pynjngai shuh shuh iaka Jaidbynriew Kuki-Zomi-Hmar kum shi bynta jong ka jingialap ban isih bad ban iashun.
Kine ki nongthawaiñ kila kyntu iaka Home Ministry jong ka Sorkar India ba kan khmih bniah ha baroh ki liang ia katei ka mat ha ka lynti ka bym shah liang bad kaba iaid katkum ka hok bad ban khmih sani bha ia ka jingleh shilliang khmat bad ka jingpyniajngai ia ki paidbah na ka jaidbynriew Kuki-Zomi-Hmar.
Kum ban shu kdew iaka SoO Tripartite Agreement la iasoi nyngkong eh ha ka 22 tarik u Nailar 2008 bad hadien kane, la iai bteng ban pynthymmai katkum ki kyndon kiba la buh ha ka Ground Rules.
Kum shi bynta jong ka Ground Rules, ka don ia ka atiar kaba khlain bha kaba la tip kum ka Joint Monitoring Group kaba kynthup ia ki tnad jong ka Sorkar Pdeng, Sorkar Jylla bad ki nongmihkhmat jongka KNO & UPF kiban peit ia ka ba dei ban bud ryntih ia ki Ground Rules.
“Ngi kwah ban buh jingkylli hato ia ka Resolution kaba la mynjur da ka iingdorbar thawaiñ kadei kaba la pynshong nongrim na kano kano ka kaiphod ne jinglap jongka JMG, kaba dei tang ma ka hi kaba peit la ka don ne em kano kano ki jingpynkhein ia ki Ground Rules.
Kane kam dei satia ka daw, hynrei ka Resolution kadei kaba la pynshong nongrim na ka jingshun bad jingisih ia kawei pat ka jaidbynriew” kila pynpaw.
Kila pynpaw ruh ba ka Tripartite Agreement kadei kaba la ioh jingiaroh na ka imlang sahlang namar kan wanrah iaka jingsuk bad jingshngain ha ka Jylla naduh ka sngi ba la iasoi ia ka ha u snem 2008.
