Rai ki District Council ban thoh sha ka Law Commission ba pyrshah pyntreikam ia ka UCC ha Meghalaya

Shillong, Naitung 12: Ki lai tylli ki Autonomous District Council (ADC) ka Jylla-ka Khasi Hills Autonomous District Council (KHADC), Jaintia Hills Autonomous District Council (JHADC) bad ka Garo Hills Autonomous District Council (GHADC), hynne ka sngi Balang, kila rai ban ieng pyrshah ia ka jingthmu ban pyntreikam ka Sorkar India ia ka Uniform Civil Code (UCC) ha Jylla Meghalaya.

Kane ka rai kala mih na ka jingialang jong kine ki lai tylli ki Autonomous District Council (ADC) ba long ha Nongbah Shillong.

Haba kren sha ki lad pathai khubor, u Chief Executive Member (CEM) ka KHADC Bah Pyniaid Sing Syiem ula pyntip ba ki lai tylli ki ADC kila rai ban phah ia ka Resolution ha ka 14 tarik mynta u bnai sha ka National Law Commission bad sha ka Sorkar India, kaba pynpaw ba baroh lai tylli ki ADC ka Jylla Meghalaya, ki pyrshah jur ia ka UCC.

U Bah Pyniaid u iathuh ba haduh mynta ki District Council ka Jylla kim pat ioh satia ia kano kano ka jingthoh na ka National Law Commission ba iadei bad ka UCC.

“Nalor ka jingthoh ban pyrshah iaka UCC, ka Resolution ba ngin phah shaka Law Commission kadei ruh ban ai jingai jingmut shaka Commission, balei ki District Council bad ki paidbah nongshong shnong ka Meghalaya ki pyrshah jur iaka UCC” la ong u bah Pyniaid.

Naka liang u Chairman ka High Power Committee ka GHADC u R.K Sangma ula ong ba naka liang ka GHADC ruh kala dep ban mynjur daka Resolution ban pyrshah iaka UCC.

U R.K Sangma ula iathuh baka GHADC kala dep ban lum ia ka jingialang bad ki Kynhun Sengbhalang lem bad ki Nokma dang ha kine ki khyndiat sngi bala leit noh bad ha kane ka jingialang la shim iaka rai ban pyrshah iaka UCC.

Pule ruh: Kynthoh tyngeh ka KHNAM ba pynjari 144 CrPC ha Shillong : Kubur ka Sorkar bym larkam ki Pulit