Shillong, Nailur 03: Ka Khasi Students Union (KSU) kala pynpaw ba kam lah ban pdiang iaka thup kyrteng jong ka bhah ki samla ban leit pule MBBS namar ba ia ka bhah jong ka Open Category la ioh da ki Bar Jylla ki bym biang ki kot ki sla kum nongshong shnong ka Meghalaya.
U General Secretary ka KSU u samla Donald Thabah ula pynpaw ba ka seng ha ka 23 tarik u Nailar 2023 lyngba ka kyrwoh khubor kala pyrshah iaka jingpynrung ia ki bar jylla ha ka Screeening list jong ka bhah pule MBBS ha kaba ka seng ka la ioh jingtip ba bun ngut ki bar jylla kila ioh rung ha ka thup Open Category ki dei ki bym biang ki kot ki sla ban pynshisha ba kidei ki nongshong shnong ka jylla Meghalaya.
Ula ong, ba ka sorkar jylla, kala kular ha ki lad pathai khubor ba kan bishar bniah ban pynshisha la kita ki samla pule ki dei shisha ne em ki nong Meghalaya, hynrei ha ka 1 tarik u Nailur, kala pynmih ia ka thup jong ki samla pule ban ioh leit pule MBBS lyngba ka bhah sorkar bad la shem ba kitei ki juh ki bym dei Khasi, kiba don ha ka Screening List ki la shah jied ban leit pule lyngba ka bhah Open Category bad kane kala pynshaiong ngain ia ki paidbah bad bun ngut kila ujor sha ka KSU.
“Ka KSU kala wad jingtip bniah halor ki kot ki sla jong kitei ki bar jylla bad kala ioh ruh ki kot ki sla lyngba ki nongpan RTI halor katei ka phang. Ki jingtip ki pynpaw ba katei ka rukom jied ia ki samla pule na ka bhah ka long kaba bakla shibun, kaba iuhroit ia ka hok jong ki samla pule kiba dei ki trai jylla ym tang ki Khasi hynrei wat ia ki bym dei riewlum kiba sah ha jylla bad kaba shu leh buittuh bad leh donbor da mano re mano” la ong u Samla Donald Thabah ha ka kyrwoh khubor.
Ula ong, ba ka KSU kala lap shibun bah ki jingduna ha kaba iadei bad ka thup Open Category bad la shem ba ki kot ki sla jong ki 9 ngut ki bar jylla kiba shah jied ki long kiba duna haduh katta katta bad kiba i shan khmat ha kaba iadei bad ka jingshisha (authenticity).
“Katkum kawei na ki kyndon ka sorkar jylla, ki samla pule ki dei ban don ki Permanent Resident Certificate (PRC) na ka jylla, hynrei ka KSU kala shem ba bun ngut kitei ki bar jylla kim shym la don ka PRC kaba pura, hynrei ki thep (submit) pynban da ki Provisional Permanent Resident Certificate (PPRC) kiba treikam tang 3 lane 12 bnai. Kaba mut ba lada kut kita ki 3 bnai lane 12 bnai kitei ki briew kim dei shuh ki nongshong shnong ka Meghalaya” ula ong.
Shuh shuh ula ong ba ka Seng ka la shem ruh ba bun bha na kitei ki PPRC ki la kut ka por (invalid). Ka jingkylli ka long ba kumno ka tnad Health ka pdiang ia kum kitei ki kot ki sla ki bym shong khia? Ki kot ki sla ki bym don hok ban pdiang kum kita ki syrnod ba shisha ban kam ba ki dei ki nong Meghalaya” la ong u Nongialam ka KSU.
“Ki don ruh katto katne napdeng kitei ki 9 ngut kiba khlem aiti ruh ia la ka Birth Certificate. Kiba thep pat ia ki Birth Certificate la shem ba ki dei ki Certificate kiba dang shu ioh shen na ka jylla khamtam na ka thain Garo Hills. Katkum ka rukom kino kino kiba applai Birth Certificate hadien shi bnai shaneng ba kha iaki, ki hap ai bad ka Court Order. Kane ka kyndon ka treikam ia baroh kynthup ia ki Khasi. Hynrei jan baroh kitei ki bar jylla ki thep ia ki Birth Certificate ki bym don wat tang ka court order kaba buh ia ka jingkylli kumno la issue ia ki Birth Certificates khlem ki Court Orders” ula ong.
“Ka Birth Certificate jong uwei u samla pule uba kyrteng u Md Mahmadul Islam la ioh ha u snem 2012 ban pyni ba udei u nong Meghalaya. Kane ka certificate ruh kam don court order. Hynrei kaba kham i kynsha ka long ba ha kata ka syrnod la kha ia u ha u snem 2003 hynrei ka tarik registration pat ka dei ha u snem 2002. Hato lah seh ban shna certificate lypa 1 snem shwa ban kha ia u briew kumba la iathuh lypa bai a une u briew yn sa kha ha u snem ban wan” la ong u Samla Donald Thabah bad ka bynrap ba uwei pat u samla pule u thep da ki kot ki sla ba na Bihar bad Rajasthan kynthup ia ka Birth Certificate hynrei une u samla u ioh ia ka PPRC na ka shnong Thangskai, East Jaintia Hills kaba pynlyngngoh ha kano ka nongrim ba la ai PPRC ia u na Thangskai.
Ula ong, haba la bishar bniah pat ia 3 ngut ki bar jylla kiba don ha thup Waiting List jong ka Open Category la shem ba uwei na kine ruh um biang ki kot ki sla ban pynshisha ba u dei u nong Meghalaya. Tang na kitei ki jingshem haneng la paw shai ba wat ki bar jylla kiba dei na Meghalaya ruh kila duh noh iaka kabu ban pule MBBS lyngba ka bhah sorkar nalor ki Khasi.
“Ar ngut ki Khasi kiba ioh ba nyngkong bad ba ar ha ka Khasi-Jaintia Category ki dei ban ioh rung ha ka thup Open Category ha ka kyrdan ba 6 bad ba 7 hynrei kila shah kynthup pynban ha ka thup Khasi-Jaintia Category. Kane ka jingleh jong ka sorkar ka pynduh noh ia ka hok jong ar ngut pat ki Khasi kiba don ha ka Waiting List jong ka Khasi-Jaintia Category. Ka Open Category kam dei ka General Category ha kaba yn ioh tang ki Non-Tribals, hynrei ka ktien Open hi ka la batai shai ba baroh lada dei ki Tribals ne Non-Tribals ki lah ban ioh rung ha kane ka thup katkum ka Merit” la ong u Nongialam ka KSU.
Kum ban shu pynkynmaw, ha u snem 2020 kala don ka jingleh buit tuh ka tnad Agriculture ban thep ia ki Khasi ha ka thup Khasi-Jaintia Category haba ki marks ki jongki ki iahap ban rung ha ka Open Category ban leit pule B.Sc. Agri.Kumta ka KSU ha une u snem ka la leit ban pynsngew ia u Bah Banteidor Lyngdoh uba dei u Myntri ka Rep ka Riang ha kato ka por bad u Bah Banteidor u la bthah mar mar ia ki ophisar ki jongu ban pynbeit ia kine ki jingbakla bad la thep ia kita ki samla pule Khasi ha ka Open Category.
“Mynshem snem ka bhah pule MBBS jong ka Meghalaya ka dei 87, hynrei ka Myntri ka Koit ka Khiah ka ong ba ka jylla ka la ioh bhah shuh shuh sa 10 tylli kaba pynkiew na ka 87 sha ka 97. Lada bishar pat ia ka ka MBBS quota list kaba mynta don tang 92 ngut ki samla ba shah jied. Shaei jah sa 5 tylli ki seats? La buh jingkylli u Samla Donald Thabah.
Ula ong ba kine ki kynrum kynram baroh ba la lap da ka seng la shem ba ki long ki jingleh donbor bad thombor ia ki trai jylla naduh ki Khasi, ki Garo bad ki bym dei riewlum, kaba pynduh ia ka hok ka jongki ban leit pule MBBS lyngba ka bhah sorkar.Kane ka pyni ruh ia ka jingthurmur ka sorkar bad ki ophisar jongka kaba ktah ban pynjot ia ka lawei ki trai jylla.
“Ka KSU ka maham tyngeh ba ka sorkar ka dei ban pynbeit mardor ia kine ki kynrum kynram lym kumta ka KSU kan hap ban shim da ki sienjam kiba tyngeh ban dawa ia ka hok jong ki samla pule Khasi” la pynkut u General Secretary ka KSU.
