Nongpoh, Naiwieng 27 : Hadien ka jingpaw ha ki lad pathai khubor, ka FKJGP-Western Zone ha ka sngi Balang, kala pynpaw ia ka jingpyrshah kaba jur ia ka rai jong ka Hima Jirang ban pdiang ia ka jingwan ka Industrial Estate ha ka thain.
Haba kren sha ki lad pathai khubor, u Assistant Secretary ka FKJGP-Western Zone Bah Polosar Mawong ula ong ba ka jing pynpaw jong ka Hima Jirang ban pdiang ia ka jingwan ki karkhana ne Industrial Estate ha Hima Jirang ka dei kaei kaei kaba ki paidbah kim sngewtynnad bad kim lah ruh ban pdiang.
“Kumba ka Seng ka pyrshah ia ka jingthmu pynkylla Industrial Estate ha ka jaka ba don ka CTI ha Byrnihat, hangne ha Hima Jirang ruh ngi pyrshah jur” ong u Bah Polosar.
Kat kum ka jingong jong u, kane ka jingai jingmut ban pdiang ia ka Industrial Estate da ka Hima Jirang ka dei kaba la mih hadien ka jingpyrshah ki paidbah ban pynkylla ia ka CTI sha ka Industrial Estate. Ula ong ba ki paidbah ki tip shai kaba kum kitei kita ki karkhana kin wan bad kaei ka jingduhnong ka ban mih hadien habud na ka jingpynmih tdem jaboh jong kine ki karkhana.
