Khliehriat, 12 Nailur: Ka All Jaintia Youth Welfare Oorganisation (AJYWO) kala leit ban ai da ka dorkhas sha ka sorkar jylla ban pyrshah jur ia ka jingthmu ka sorkar ban wanrah iaka lynti rel hapoh ka East Jaintia Hills District.
Katkum ka kyrwoh na u Bah Heatermoon Ryngkhlem, President ka AJYWO East Jaiñtia Zone ula pyntip ba ka seng kala lei tai ia ka dorkhas ha ka Sngi Nyngkong ha ka ophis jong u Deputy Commissioner ka East Jaintia Hills District bad sha u Myntri Rangbah ka Jylla u Conrad K. Sangma, ban pyrshah jur halor ka jingthmu jong ka sorkar ban wanrah lynti rel ha East Jaintia Hills District bad ia kateika dorkhas la ai lang ruh sha ki arngut ki MLA ka District u Bah Kyrmen Shylla bad Kong Santa Mary Shylla.
“Kumba long kiwei kiwei ki sengbhalang bad u paidbah jong ka East Jaintia Hills, bad u paid ka Bri u Hynniewtrep, ka AJYWO ruh, ha kawei ka sur ka pyrshah jur ia ka jingthmu jong ka sorkar jylla ban wanrah lynti rel ha ka District, halor ka nongrim jong ka jingbym pat pyntreikam ia ka Inner Line Permit (ILP) tad haduh mynta ruh” ong u Bah Heatermoon Ryngkhlem
“Ka Jylla Meghalaya kadei ka jylla kaba rit tam ha ka Ri India bad ka dei ka jylla jong ki jaitbynriew riewlum ba rit paid tam bad ba dang sahdien tam ha baroh ki liang, kaba don mynta hapdeng ka jingma kaba khraw na ka jingshah tyllep ha kiwei pat ki jaitbynriew heh paid na ri thor, kiba rung ba mih, wan shong wan sah, ,iwan trei, wan ktah katba mon ha ka jylla, khlem da don ka aiñ kaba pyrkhing bha ban tehlakam ia kane, kaba la ktah bad buh shisha ha ka jingma kaba khraw ia ka ri bad ka jaitbynriew rit” ula ong.
U Bah Ryngkhlem ula ong ba ka East Jaintia Hills, kadei ka district kaba rit, kaba don tang 1,22,939 tam ngut ki trai shnong katkum ka PPF 2011 census. Tang lyngba jong ki surok kala long lypa ka District kaba la jan shah tap tyllep da ki briew kiba na bar ka jylla, kaba la ktah mynta haduh katta katta, ia ka ioh ka kot, ka khaïi ka pateng, ka jingbun paid bad ka jingshongshngaiñ jong ki trai shnong bad ka jingma ka ap lada wan sa ka lynti rel.
Katba u General Secretary ka AJWYO u Bah R.Siangshai, ula ong, lada katei ka lynti rel kan wan, kan plie lad shuh shuh ia kiwei ki jaidbynriew heh paid, ban rung ban mih, ban shong ban sah bad ban kamai kajih katba mon hapoh jong ka District kaban ktah shuh shuh iaka iohkam iohjam jong ki trai shnong.
