Shillong, Rymphang 14 : Ki bor pyniaid elekshon kila mih ban iakhun tyngeh pyrshah iaka jingpyndonkam bakla iaka bor pisa bad kiwei kiwei ki jingpynngop ia ki nongthep vote ha ka elekshon kaban long ha ka jylla.
Ka jingioh kurup ka tnad Election haduh ka 9 tarik u Rymphang ka long T.51.27 Klur, la iathuh u Chief Electoral Officer Bah FR Kharkongor haba iakren bad ki nongthoh khubor hynne ka sngi.
Na katei kaba ioh kurup, T.6 Klur kadei ka pisa bad T.23 Klur ka dei na u Drug bad kiwei kiwei ki jingdih pynbuaid bad ka pisa kaba tam kaba ioh kurup ka dei na kiwei pat ki liang.
Ha kaba iadei bad ka jinglong jingman ka suk ka sain ha ka jylla, u Bah Kharkongor ula ong, ba ka jylla kadei kaba shongsuk shongshngain ha ba phai sha ka jingpynlong ia ka elekshon.
“Wat ha ka por ba khlain ki kam pyntriem jong ki kynhun kieng atiar ha ki snem 2008-2013, ka jingpynlong ia ka elekshon kala long kaba iaid beit bad kaba shongsuk bad lada don kano kano ka huri hura kam dei satia kaba heh hynrei kaba shu jia ryngkhat. Ngi kyrmen skhem bad ngi khmih lynti ba ka jingthep vote kan long kaba iaid beit bad kaba khuid ba suba” ong u Bah Kharkongor.
Ula iathuh ba na ka bynta ka elekshon ha Meghalaya, na ka liang jong ka Election Commission kala phah bun pyrton ki pulit.
“Kila mang 119 pyrton pulit ia kaba 40 tylli ki pyrton kila dep ban wan poi sha ka jylla bad kine ki pyrton kila wan poi kloi bha shwa ban long ka elekshon” ong u CEO.
Ula ong, hadien ka jingthep vote ha ka jylla Tripura, ka jylla kan sa ioh sa 79 pyrton ki pulit bad ki pulit ka jylla kila dep ban pynkhreh ia ki jaka ban buh ia kitei ki pulit.
“Ngi lah dep ban shong jingialang bad ka kynhun jongki pulit bad katkum ka jingdonkam yn sa buh ia ki pulit ha ki jaka kiba don h rilum Khasi, Jaintia bad kumjuh ha rilum Garo” ong u Bah Kharkongor.
