Shillong, Lber 02: Ka sorkar jylla kala shim ia ki sienjam kiba thikna ban pynjanai ia ki jingtei ha ki lad pyniasoh lyngba ka Meghalaya Integrated Transport Project (MITP) bad ka jinglut jingsep jong kane ka projek kan kot sha ka T.1238.01 Klur.
Ia kane ka sienjam la shim da ka jingthmu ban pynkhlain ia ka ioh ka kot bad ban kyntiew ia ka rukom im ki nongshongshnong. Kane ka sienjam ka dei kaba la pynwandur ban lah pyniaid ryntih bad ban don ka jingshngain ha ka leit ka wan, ban pynbiang ia ki jingdonkam ba donkam man ka sngi bad ban pyniasoh ia ka leit ka wan ha ki jaka kiba don sha kyndong bad ki iew kiba heh.
Ka jinglut jingsep jong kane ka projek ka long 150 million US dollar kaba kynthup ia ka ram World Bank kaba long T.120 million US Dollar bad ka jingbei tyngka ka jylla kaba long 30 million US dollar.
Kane ka project kala sdang treikam ha ka 21 tarik u Kyllalyngkot 2021 bad kan kut ha ka 31 tarik u Risaw 2026.
Kumba long mynta, ka jingpynlut kala kot sha ka T 933.00 klur ha kaba ia ka T.678.75 Klur la dep ban pynphai da ka Department of Economic Affairs.
Lah dep ithuh ia ki 18 tylli ki project ha kylleng ki district jong ka Meghalaya kaba kot T.45.47 klur bad ia kane la bei da ka World Bank.
Haduh mynta, 11 tylli ki project shna surok la dep ban shna bad sa 6 tylli ki project shna surok ki dang iaid shakhmat.
Na ka bynta ka jingiasyllok, ka MITP kala shim ia ki 27 tylli ki consultancy project, kaba kot T.103.51 klur kadei kaba dang shimkhia.
Ia kane la pynpaw ha ka thup jong ka Supplementary Demands for Grants and Supplementary Appropriation for 2024-25 kaba la wanrah ha ka iingdorbar thawain ka jylla ha ka sngi Thohdieng.
