Shillong, Iaiong 13 : U Majistor ka West Jaintia Hills, hynnin ka sngi Balang, ula hiar sha Block-I bad pynsangeh shisyndon ia ka jingshna surok be-ain jong ka Sorkar Assam- kaba pyniasoh naduh ka shnong Umkhyrmi kaba hap ha Block-I shaduh sha Khatkasla bad Psiar jong ka West Jaintia Hills.
Kane ka jinghiar u Majistor Bah WK Kharbuki, ka dei kaba la pynlong hadien ka jingioh pdiang ia ka jingujor ba ka Sorkar Assam kala shna ia ka surok ha Block-I khlem da ioh jingmynjur na ka Sorkar Meghalaya.
Ia u Bah Kharbuki la synran da u DSP ka District AJ Sangma bad u Block Development Officer ka Laskein Bah B Niang lem bad ki Pulit ka District.
Haba poi ha ka shnong Riat Kyn-O bad Iurim Biam kaba don ha khappud ka shnong Khatkasla bad Psiar, West Jaintia Hills, ka kynhun kala lap ia ki nongbylla lem bad ki kali puh shilum kiba dang lur ia ka khyndew ban shna ia ka surok.
La iathuh ba kane ka surok ka dei kaba pyniasoh na ka Shnong Umkhyrmi sha Khatkasla bad ka shnong Psiar,West Jaintia Hills.
Kat kum ka jingong u Bah Kharbuki, u contractor ba pyntrei ia kane ka surok u dei u Khasi ba na Meghalaya, uba la iathuh ba kane ka jingshna surok ka dei naduh na Umkhyrmi sha Khatkasla, kaba jrong kumba 10 km eiei.
Ula pyntip ruh ba u contractor ula kam ba kane ka surok ka dei kaba la bei tyngka da ka Sorkar Pdeng bad la pyntreikam ia ka da ka sorkar Assam.
Namar kata, une u Majistor ula pynsangeh noh ia ka jingshna ia kane ka surok bad bthah ia ki nongbylla ba ki dei ban pyn trei biang ia ka kam tad hadien bala ioh jingmynjur na ka Sorkar Meghalaya.
