Shillong, K’lyngkot 30 : U Myntri ka tnad Pule Puthi Rakkam A Sangma ha ka sngi Ba-ar, ula pyntip ba shen yn sa wanrah noh ia lai tylli ki Common University Entrance Test (CUET) centre ha Jylla Meghalaya.
Haba iakren bad ki nongthoh khubor, u Rakkam ula ong “Tang ban pyntip sha baroh ba mynshisngi nga la ioh iakren phone bad u DG ka National Testing Agency (NTA), New Delhi, uba la pyntip ia nga ba na ka bynta ka Post Graduate Course, lai tylli ki CUET Centre yn sa buh noh ha Meghalaya- kawei ka Tura bad artylli ha Shillong”.
“Hynrei, ka shong kat kum ka jingdon jong ki samla pule, ki lah ruh ban plie kham bun ki centre hapoh ka Jylla” ula bynrap.
Kane ka jingkren jong u kala mih halor ka jingiai mih ki jingkynnoh na ka kynhun Liang Pyrshah Voice of the People Party (VPP) ba ka Sorkar Jylla kam shym la leh eiei ban pynbeit ia ka jingeh ba mad da ki samla pule kiba dei iakhun ia ka eksam CUET.
U Rakkam ula kyntu ia ka VPP ba kan wan iakynduh ia u khnang ba un ioh ban batai sha ki halor kane ka kam. “Lehse kane ka dei ka buit ba katto katne ki politician ki ju leh. Shu khein ba lada don kaei kaei kaba jia, ki dei ban leh tang ban ioh burom” ula ong.
Hynrei ula ong ba ka dei ka kamram jong ka Sorkar Jylla bad ka Tnad Pule Puthi kala pyrshang katba lah ban pynbeit ia kane ka jingeh ki samla pule.
Ha kawei ka liang, u Myntri ula pynpaw ia ka jingsngewkhia halor ka jingduna ki samla pule ka Jylla kiba pass ia ka CUET bad ruh ia kiwei kiwei ki eksam.
“La iathuh ia nga da u VC ka NEHU ba bun ki seat kila lait namar mynshem snem, bun bah ki seat kila lait ha NEHU namar ka jingbym pass ia ka CUET. Nga kwah ban kyntu ia baroh, ki samla pule jong ngi, ba kin pynkhreh bha ia kum kine ki eksam” ula ong.
Ula ong ba lada donkam, ka Sorkar ka lah ban rai ha kaban buh noh da ki coaching centre hynrei ia mynta, ki jaka pule kila biang nadong hadong ban pynkhreh ia ki samla pule ba kin ialeh ia kine ki eksam.
