Shillong, Naiwieng 03 : U Myntri Khynnah ka Ministry of Agriculture & Farmers Welfare ka Sorkar India Bhagirath Choudhary ha ka sngi Ba-ar, ula pyntip ba kam shym la don kano kano ka jingtyrwa ban kyntiew kyrdan ia ka College of Agriculture ha Jylla Meghalaya sha ka University.
Ula jubab ia kane ha ka unstarred question No.1195 bala wanrah da u MP ka Shillong Ricky AJ Syngkon ha Parliament.
U Myntri ula pyntip “Na ka bynta ka Scientific Research bad ban kyrshan ia ka rep ka riang bad kan kiew ha Jylla Meghalaya, ka Sorkar kala buh ia ka ICAR Research Complex for North Eastern Hills (NEH) Region, Umiam, 07 Krishi Vigyan Kendras (KVKs) bad 03 tylli ki Colleges (i) College of Post Graduate Studies in Agricultural Sciences, Barapani (ii) College of Community Science, Tura (iii) College of Agriculture, Kyrdemkulai.”
Shuwa kane, u Choudhary ula pyntip ba ki don 3 tylli ki Central Agricultural University, 4 tylli ki Indian Council of Agricultural Research (ICAR) kiba la ibit ban long ki University, bad 4 tylli ki Centrel University kiba ai jinghikai halor ka kam rep hynrei kam shym la don satia kano kano ka jingtyrwa ban kyntiew kyrdan ia kine ki college sha ki University kiba pura.
Nab aka kam rep kynthup ka jingpule halor ka rep ka riang ka dei ka sobjek jong ka Jylla, ka Sorkar Jylla ka lah ban kyntiew kyrdan lane plie iala ka Agricultural University ba thymmai kat kum ki jingdonkam ka Jylla na ka bynta ban ai jinghikai halor ka rep ka riang, ka jingwad bniah bad kiwei kiwei, ula ong.
