Pyntip u Himanta ba ha ka 10 tarik u Lber, yn thaw ia ka kynhun iatreilang hapdeng ka BJP bad AGP

Guwahati, Rymphang 28: U Myntri Rangbah ka Assam u Himanta Biswa Sarma, ula ong, ba ka BJP ka lah ban pyndep ia ka jingiapynbeit ia ka jingiasam shuki bad ka paralok jong ka, ka Asom Gana Parishad (AGP) hapoh ka 10 tarik u Lber na ka bynta ka elekshon sha ka ïing dorbar thawaiñ ka jylla ban wan.

U Sarma ula ong, ba ka BJP ka lah ban jied ïa ki “jingïakhun paralok” ha ki konstitwensi ba don ka jingïakynad ban ïasam ia ki Seat kiba khlem pat lah ban pynbeit.

Ula pynpaw ïa ka jingkyrmen ba ka BJP kan lah ban ïasoi ïa ka jingïateh kular bad ki paralok ba kongsan jongka — ka AGP bad ka Bodoland People’s Front (BPF) — hapoh ka por ba la buh.

“Ngin sngewkmen lada ka BJP bad ka AGP kin poi sha ka jingiasngewthuh jingmut halor ka jingiasam ia ki Seat, hynrei ngin don ki jingiakhun paralok lada don ki jingiatyngkhuh ha ki katto katne ki Seat”, la ong u Sarma.

U Myntri Rangbah ka Jylla u la bynrap ba ïa ka jingïateh bad ka BPF ba la ïalam da u Hagrama Mohilary la kham bun ne kham duna la pyndep noh ha lane shwa ka 26 tarik u Rymphang bad ka pynpaw ïa ka jingsngewskhem ba ka jingïasngewthuh jingmut kaba kum kane bad ka AGP kan sa poi ha ka 10 tarik u Lber.

Ha kajuh ka por, ka Congress, ka paw ba ka dang ïakhun bad ki jingeh hapoh jong ka, halor ka jingthmu ban ïatreilang bad ka Raijor Dal kaba dei ka seng riewlum, kaba la ïalam da u MLA ba marwei jong ka, u Akhil Gogoi.

Ki tyllong khubor ki iathuh ba ka jingiakren hapdeng ka Congress bad ka Raijor Dal ka dang iaid shakhmat, hynrei ka jingiakren kam pat iaid beit iaid ryntih haduh mynta.