Shillong, Iaiong 26: U Symbud Myntri Rangbah ka jylla Bah Prestone Tynsong hynnin ka sngi Ba-ar, ula ong ba ka sorkar kan pynleit jingmut tang ha kaban pyntreikam iaka Roster System ym ban pynkylla ia ka Reservation Policy.
“Ka kamram jong ka sorkar kadei tang ban khmih bniah biang bad ban pule bniah halor ka Roster System bad ngi dang iaid ha kane ka bynta” ong u Bah Prestone haba iakren bad ki nongthoh khubor.
Ula pyntip ba ha u bnai Jymmang yn sa lum iaka jingialang bad baroh ki seng saiñ pyrthei ban iakren ha kaba iadei bad ka Roster System.
“Ngin sa lum ia ka jingialang bad baroh ki seng sain pyrthei ban iakren halor ka Roster System, hynrei shwa ba ngin leh ia katei, ngin iakren bad iatai sani haka kynhun Myntri bad ngin sa don ruh iaka jingiatai kaba sani bha ha ka kynhun jong ka Meghalaya Democratic Alliance(MDA)” ong u Bah Prestone.
Ha kaba iadei bad ka jingdawa jong kiba bun, ban pynkylla noh iaka Reservation Policy jong ka jylla, u Symbud Myntri Rangbah ula ong, “Ban pynkylla (Amendment) kan ym mih. Katei kam dei ka Aiñ, kadei tang ka Policy kaba la wanrah bad sdang naduh u snem 1972”.
“Nga iohi ia kawei ka seng sain pyrthei kaba dawa ba dei ban pynlong ia ka Dorbar Kyrpang, ia kaba ym donkam eiei, lait noh sa tang lada ka sorkar ka don jingthmu ban pynkylla noh ia kano kano ka aiñ. Ka bor kaba halor eh ban mynjur ia kano kano ka jingpynkylla ia ka aiñ kadei tang ka iingdorbar thawaiñ” ong u Bah Prestone.
U Symbud Myntri Rangbah ula ong, “Kam long kaba suk ban shu dawa ban pynkylla ia ka Reservation Policy. Hynrei lada iakren halor ka roster system, hooid, ka sorkar ka dang khmih bniah ia kane ka mar bad shisien ba kala dep ia kane, ka kynhun myntri kan sa shong pyrkhat bad ngin sa iawer ia baroh ki seng saiñ pyrthei bad ia baroh kiba don bynta ha kaba ngin sa pynshai shaphang ka roster system bad kumno yn pyntreikam ia ka naduh mynshwa ne nangne shakhmat”.
Ula ong, ba ka jingsngewkhia jong kiba bun balang bad ki paidbah mynta kadei halor ka roster system ba dei ban pyntreikam nangne shakhmat ym naduh ki snem kiba mynshwa.
“Nga tharai kane kadei ka mat kaba kham kongsan tam. Nga lah iohi ba bun ki snegbhalang ka jylla kila dawa ia katei ka juh hi” ong u Bah Prestone.
Ha kaba iadei bad ka jingdawa ka seng VPP halor katei ka mat, na ka liang u Bah Tynsongula ong, “Ka VPP kumba phi tip, ka buh sharud ia ka Roster System bad ka buh hakhmat eh iaka Reservation Policy. Ka Reservation Policy kumba ka long mynta, ngam pat kwah ban ong eiei, namar ka sorkar kan pynleit jingmut shwa tang ha kaba iadei bad ka roster system.”
