Shillong, Risaw 28 : U Symbud Myntri Rangbah ka Jylla Bah Prestone Tynsong hynne ka sngi thohdieng, ula ong ba ka jingpynmih pisa ba manla u bnai jong ka Meghalaya Energy Corporaton Limited (MeECL) ka lah ban kot noh shen sha ka T. 100 klur.
“Ngi la pyrshang katba lah ban pynjanai ia ka jingpynmih pisa jong ka MeECL manla u bnai bad kan sa kot noh shen sha ka T. 100 klur “ ong u Bah Prestone haba iakren bad ki nongthoh khubor.
Ula ong baka MeECL kala pynlut palat ia ka T. 150 klur manla u bnai na ka jingpynmih pisa ba kot T. 75 klur.
“Shisien ba ngi la kynjoh ia ka T. 100 klur, ka jingduna pisa kan sah noh satang T. 50 %” ula bynrap.
U Bah Prestone ula ong ba ka Corporation kan hap ruh ban pynkhuid ia ki ram ki shah ba manla u bnai nalor ba ka Jylla ka hap ban thied ia ka bording na ki CPU bapher bapher.
“Ngi donkam ban pynkhuid ia ka ram ka shah naba ngim kwah ba kan don ka jingshah ot biang ka bording” ula ong.
Haba kylli, u Symbud Myntri Rangbah ula ong ba ia mynta hi ka Sorkar na ka por sha ka por ka hap ban iarap ia ka MeECL.
“ Watla katta, ia kine kiei kiei baroh la shong bishar mynta. Mynta ngi la don ia u CMD uba la shimti dang shen. Ula trei miet la bad sngi ban wad ia ki lynti kumno ban kyntiew iaka jingpynmih pisa” ula ong.
Ha kajuh ka por, u Bah Prestone ula pyntip ba ka Sorkar kan sa plie noh shen ia ka Unit ba nyngkong jong ka Ganol Project ia kaba la buh ban pynlong ha u bnai Nohprah mynta u snem.
“Ha Mawshynrut ruh ka dei kawei hynrei kane ka dei ka Hydro Project kaba rit. Ka jingthmu jong ka Sorkar hi ka long ban pyntrei biang ia ka Stage-II jong ka Leshka Project. Ngi kyrmen skhem ba ngin lah ban pyntrei ia ka” ula ong.
