Shillong, Risaw 26 : U Myntri Rangbah ka Jylla Conrad K Sangma hynne ka sngi Balang ula ong ba ka Sorkar Jylla kan sa wanrah bad mynjur ia ka Ordinance ban pyndam noh ia ka Meghalaya Regulation of Gaming Act (MRGA), 2021 ha ka jingialang ban wan jong ka Kynhun Myntri ka ban sa long shen.
“Ha ka sien sjong jingialang jong ka Kynhun Myntri, ngin sa wanrah noh ia ka Ordinance” ong u Conrad haba iakren bad ki nongthoh khubor.
Ka rai jong ka Sorkar ban pyndam noh ia ka MRGA Act kala mih hadien ka jingpyrshah kaba jur na ki kynhun bapher bapher ba kynthup ia ki Nongialam Niam bad ki kynhun Sengbhalang, kiba ieng pyrshah ia ka jingthmu ban wanrah ia ka ktem khalai Casino hapoh ka Jylla.
Kane ka rai kala mih ruh tang hadien katto katne sngi ba ka Khasi Jaintia Church Leaders Forum (KJCLF) kala pynlong ia ka jingduwai kyrpang pyrshah ia ka jingle mynthi jong ka sorkar ia ka jingdawa ban khangdam ia ka karkhana casino bad ban pyndam noh ia ka MRGA 2021.
Ha ka 14 tarik Risaw, u Myntri Rangbah ka Jylla ula pyntip ba ka jingpyndam noh ia ka Act ka dei kaba lah ban leh tang lyngba ka ordinance, kaba lah pat ban mynjur da ka Iingdorbar Thaw Ain.
Ula ong b aka Sorkar dang shen kala pyndam ia ka Meghalaya Street Vendors (Protection of Livelihood Regulation of Street Vending) Act lyngba ka Ordinance bad hadien la pyndam pura hapoh ka Iingdorbar Thaw Ain.
“Kumjuh ruh kino kino ki Ain ki dei kiba lah ban pyndam tang lyngba ka Ordinance bad kane ka dei ka lynti kaba ngi hap ban bud” ula bynrap.
U Myntri Rangbah ka Jylla ula iengskhem ruh ha ka nongrim ba da ka jingpyndam noh ia ka MRGA, kan nym don shuh kano kano ka ain ka ban teh pyrrkhing ia kiwei pat ki jait kam khalai hapoh ka Jylla.
“Namar kata, kane kadei kawei pat ka khajan. Khlem pep ngin sa long biang kumba ju ong bad ngin hap ban peit kumno ban gin jam shakhmat ha kane ka bynta” ula ong.
