Shillong, Jymmang 17: U Myntri Rangbah ka jylla u Conrad K Sangma ula ong, ba ka jingiakren iasuk ba shong ain (Official) hapdeng ka kynhun kieng atiar Hynniewtrep National Liberation Council bad ka sorkar kan sa sdang ha ka taiew ba nyngkong jong u bnai Jylliew mynta u snem.
Hadien ba la wai ka jingialang jong ka kynhun Myntri, u Conrad Sangma ula iathuh ha ki nongthoh khubor, “Hynnin ka sngi, u Symbud Myntri Rangbah ka jylla u Bah Prestone Tynsong ula iakynduh ia ki nongialam ka HNLC ha kaba la donlang u Political Secretary, Vice Chairman bad ki Executive Member ka HNLC ryngkat bad u Ksiang bad ha kane ka jingiakynduh la shim ia ka rai ba ka jingiakren iasuk kan sdang noh naduh u bnai ban wan”.
U Conrad K Sangma ula ong, ba katei ka jingiakren bad ka HNLC kala iaid shakhmat lyngba u Ksiang.
“Kila pynpaw ia ki katto katne ki mat bad kum ka sorkar ngin pyrshang ban pynthikna ba kino kino ki sienjam kiba ngi shim kin pynthikna ba kin long kiba iahap bad ki kyndon bad kiban long shngain ha baroh ki liang bad wat ia kiwei ki mat kiba sngewkhia ruh ngin pyrshang ban shimkhia” ong u Myntri Rangbah.
U Conrad Sangma ula ong, “Hynrei lada ki kyndon ki long pat shabar u pud u sam jongka jingkhmih ka sorkar jylla bad kin don ruh ki jingiakren kiba hap ban donlang ki heh jong ka sorkar pdeng bad ia kitei ki mat yn hap ban iakren ha katei ka kyrdan. Kumta ka jingiakren kala sdang ba ngin sa peit kumno kan iaid shakhmat bad ngi khmih lynti ba ngin lah ban pynbeit ia ki jingeh”.
Haba kylli kiei ki mat jong ka jingiakren iasuk, u Myntri Rangbah ula ong, ka jingiakren kan sa sdang, kumta ynailad shwa ia u Ksiang ba yn iakren bad na ka liang jongka sorkar ruh kan sa donlang bad kam long kaba iahap ban ong eiei mynta namar ka don ka rukom iaid bad u Ksiang yn hap ban shong iakren bad ki halor ki mat ki bapher hynrei mynta yn ailad shwa ba ka jingiakren kan sdang noh.
