Shillong, K’lyngkot 11 : U Myntri Rangbah ka Jylla Conrad K Sangma hynne ka sngi Balang, ula pyntip ba ka jingtih dewiong da ka jingstad saian kan sa sdang noh shen ha Jylla Meghalaya.
“Mynta ka kam ban tih dewiong da ka jingstad saian bad ka jingpan ia ka mining plan ban ioh jingmynjur, kila don bad ka Sorkar Pdeng” ula iathuh haba iakren bad ki nongthoh khubor.
Halor ka jingkynnoh u Nongialam ka Liang Pyrshah (AITC) baka Sorkar MDA kam kwah ban sdang ia ka jingtih dewiong ba iaid kat kum ka ain ha Jylla, u Conrad ula kynthoh kylla da kaba ong “U Dr Mukul ula klet ba dei ha ka por jong u kum u Myntri Rangbah ba la khang ia ka jingtih dewiong” bad bynrap “Ngim tip ba ula leh aiu ha kine ki san snem halor kane ka kam”.
Haba pynpaw ba ka sorkar jong u, kala leit ban iakhun pyrshah ia ka hukum ka NGT hapoh Iingkashari Supreme Court, ula ong “Ngi (MDA) la lah ban weng iaka jingkhang tih dewiong. Bad hadien bala weng ia ka hukum, ngi la applai ia 18 tylli ki licence kiba la ioh bad mynta ia ki mining plan jong kine, la dep aiti bad ngi kyrmen ba ka kam kan iaid shakhmat” .
Haba thalain ia ka Liang Pyrshah halor ka jingbym kren ia ka jingshisha, u Myntri Rangbah ula ong “Kila klet ba dei ha ka por jong ki ba la mih ka hukum ka NGT ba khang ia ka jingtih dewiong hynrei dei kane ka Sorkar kaba la lah ban weng noh ia kane ka hukum (NGT) lyngba ka hukum jong ka Iingkashari Supreme Court”.
Halor ka jingujor ka AITC pyrshah ia ka NPP ba kam lah ban ai jingkhein ia ki jingpynlut ha ka elekshon bala dep, une u Nongialam ka NPP ula ong “Kila leit ban ujor mukotduma ha Iingkashari hynrei ka Iingkashari kala kyntait ban shim bishar iaka”.
