Shillong, Naitung 28 : U Myntri Rangbah ka Jylla Conrad K Sangma ula pyntip ba ki don katto katne ki jaka ki ban sa mih ki flyover ha nongbah Shillong.
Haba iakren bad ki nongthoh khubor, u Conrad ula pyntip ba ka Sorkar kala phaikhmat mynta ban shna ia ka flyover na na jingkieng Umshyrpi sha Rhino Museum bad ruh shaduh Anjalee Point.
“Ha kiwei ki jaka, ngi hap ban peit ia ka jingdon jaka namar haba shna ia ka flyover ngi hap ban ioh ia ki jaka ban pynieng ia ki paia bad ruh ia ki bynta jong ka surok kaba kiew” ula ong.
“Namar ka jingkhapngiah bad namar ki jingtei kiba mih ha ki katto katne ki jaka, kiba bun ki jaka kim long satia ban shna ia ki flyover watla ngi kwah eh bad kumta haba don ki jaka ba ngi lah ban ioh, ngin hap ban khmih ban bishar” ula bynrap.
Kat kum ka jingong jong u, ka jingdonkam ban shna ia ki flyover ka dei kaba la tyrwa la slem bha da kiba bun ki nongshongshnong jong ka Jylla.
