Shillong, Naiwieng 20 : U Myntri Rangbah ka Jylla Conrad K Sangma ha ka sngi Balang, ula pyntip ba bun ki project ba kongsan, kiba la pyntrei ha New Shillong Township, yn sa pyndep noh haba kut jong u 2026.
U Conrad ha ka jingsynran u Symbud Myntri Rangbah ba khmih ia ka Urban Affairs Bah Sniawbhalang Dhar, kila hiar leit jurip ia ka jaka ba 232 acre bala aiti ban tei ia ka New Shillong Administrative City, kaba don ia ka Administrative Complex kaba heh bha ba kynthup ia ka Secretariat Building bad baroh ki Directorates.
“Ngi la ieng ha ka jaka ban tei ia ka Secretariat ba thymmai bad ki Directorate thymmai jong ka Sorkar Meghalaya..Kan ym long tang ka Secretariat bad Directorate bad kumba phi iohi ha lyndet jong nga, kila don ruh shibun ki project kiba dang pyntrei ha kane ka thain la ka dei ka IT Park phase-I & 2, Utility Mall, Integrated Command & Control Centre (ICCC), Skill Park ba thymmai, Prime Hub, Heliport ka Shillong ruh yn tei hangne bad ka Urban Building kaba heh bha kan sa mih hangne” ong u Conrad haba iakren bad ki nongthoh khubor.
U Conrad ula pynpaw ruh ia ka jingkmen ban iohi ba bun ki project kila iaid shaid shaid ha ka jingpyntreikam.
“Nga la wan mynta ha ryngkat bad u Symbud Myntri Rangbah bad ki Ophisar ban peit ia ki project bapher bapher kiba la pyntrei bad ngi kmen ban iohi ba bun na ki, kila dep bad bun ruh ki dang iaid shaid shaid bad haba kut u 2025, ngin sa iohi ia ka jingdep jong kiba bun ki project bad haba kut u 2026, ngin sa iohi ia bun ki project kiba heh kin sa dep lut” ula ong.
Haba pynpaw ba ka jaka ka long kaba kongsan na ka bynta ka roi ka par jong ka Jylla, u Conrad ula ong “Ngi kmen ban iohi ba ki kam kila iaid kumba la thmu bad nga kwah ban ai khublei ia u Symbud Myntri Rangbah ba khmih ia ka Tnad Urban Affairs lem bad ka kynhun ka Tnad Urban kiba la pynleit jingmut bha bad pynrulong ia kiei kiei baroh”.
