Shillong, Nohprah 19 : U Myntri Rangbah ka Jylla Conrad K Sangma ula kular ba ia ka kaiphod jong ka Expert Committee halor ka State Reservation Policy, kaba khia kumba 200 kg bad don haduh 4000-5000 sla, yn sa pynmih paidbah noh shen.
Haba jubab ia ka jingbyrngem u President ka VPP ban pynlong ia ka jingiakhih lada ym sei paidbah noh ia kane ka kaiphod, u Conrad ula ong “Ngin sa pynlait paidbah kumba nga ong, ka dei kaba don haduh 4000-5000 sla bad ba khia haduh 200 kg. Ngi hap ban pule bha man ka kyntien jong ka kaiphod namar wat u coma ruh u lah ban pynkylla ia ka jingmut jong ka kaiphod lane ka lain”.
Ula batai ia ka jingsyllang ka kam, haba pynpaw ba ki Ophisar ki hap ban shong bishar thik pa thik ia manla ka sla jong ka kaiphod.
“U Chief Secretary bad kiwei ki Ophisar ki hap ban pule man ka lain, man ka sla bad ka dei ka kam kaba eh bha…..kin sa aiti noh ia ka bad kin sa wanrah sha ka jingialang ka Kynhun Myntri…hooid shen ngin sa pynlait paidbah ia ka namar kam don satia kano kano ka jingeh ban pynlait paidbah” ula ong.
U Conrad ula ban jur ia ka jinglong kongsan ka kaiphod ia ki paidbah bad ong “Khlem pep ngin sa pynlait paidbah ia ka…ka dei ka kam kaba hap phikir bha, ki Ophisar kim lah ban kyntait wat tang shisla lane shi kyntien jong ka kaiphod”.
