Shillong, June 21: U Myntri Rangbah ka jylla u Conrad K Sangma ula pyntip ba ka jingpynlip iaka bording elektrik ne ka Load Shedding haka jylla kan dang iai bteng shwa ia mynta shipor.
U Conrad Sangma, ula kubur ba kala don ka jingkiew ha ka jingioh ia u slap, hynrei ban shu shaniah tang ha u slap ba yn weng ia ka jingeh jong ka jingkyrduh bording kan ym long ka lynti kaba dei than bad ula banjur ia ka jingdonkam ban long kiba phikir bha ha kum kane ka khyllipmat kaba mynta.
Haba iakren bad ki nongthoh khubor u Myntri Rangbah ka jylla ula ong, ba ha ka sien kaba nyngkong eh ha ka histori jong ka jylla baroh lai tylli ki thaiñ kata ka Ganol ha rilum Garo, ka Leshka ha rilum Jaintia bad ka Umiam ha rilum Khasi kila noh synniang bha ha ka jingpynmih iaka bording elektrik. Kane ka mut ba baroh 3 tylli ki jaka bad ki thaiñ ia mynta kila noh synniang sha ka kam pynmih bording bad kane ka long ka jingjop iaka jylla Meghalaya.
Watla kala don kane ka jingjia kaba sngewtynad hynrei u Myntri Rangbah ula maham pat ban long kiba phikir bha bad kane ka long kaba kongsan tam ha kaban ialeh ban pynduna iaka jingeh naka jingkyrduh iaka bording elektrik.
Ula ong tang da kaba shu shaniah beit ha u slap kan ym long kaba biang ban lah ban pyndap iaka jingdawa jong u paidbah iaka bording elektrik kumta ka long ruh kaba kongsan bha ban wad ia kiwei pat ki lad ki lynti ban pynthikna ba weng iaka jingeh na ka jingduna haka jingpynmih iaka bording elektrik.
