Shillong Rymphang 26: U Myntri Rangbah ka jylla u Conrad K Sangma hynne ka sngi Palei ula pynrem jur ia u National Secretary barim ka BJP Sunil Deodhar haba pyntip ba ka Sorkar kala shim ia ki sienjam katkum ki kyndon ain pyrshah ia une u briew halor ka jingkren bakla bad laplah, kaba ym lah ban pdiang satia.
“Nyngkong eh kum ka sorkar ngi la kyrshan ia baroh ki niam bad ki jaidbynriew bad ia baroh ki kynhun ha ka imlang sahlang. Ia kiba dang bat ia ka Niam Tynrai, ngi la ai bunbah ki skhim haba ki la pynlong ia ki prokram bapher bapher” ula ong.
U Conrad ula ong “Lada phi kylli ia ki nongialam ki jong ki seng Niam Tynrai, kin sa iathuh ba kiba bunbah ki prokram bad ki skhim kila wan ha ka por jong kane ka Sorkar…….. la kadei ka Cultural Centre ha Mawkhar, ka jingpyntrei ia ki kam pynroi ha Smit ia kaba nga dang shen nga lah wan plie ne wat ka CMSDF Scheme kaba nga lah ai dang hynne ka janmiet”
U Conrad ula ong ba ki jingkren u Deodhar ki dei kiba bakla shibun bad kaba ialam bakla. “Ka jingkren une u briew ka dei ka bym lah satia ban pdiang. Kine ki dei ki jingkren kiba kynshoit ia u paidbah bad ba pyrshang ban pyniapait iapra ia ka imlang sahlang kaba ngim dei ban pdiang satia” ula ong.
“Une u briew u hap ban pynbeit ne ban panmap ia ki paidbah ka Jylla…Ngim lah satia ban pdiang ia kane bad ka Sorkar kan sa shim ia ki sienjam ba kongsan ban pynthikna ba ngim dei ban ailad ia kum kine ki jait jingkren” ula ong.
U Conrad ula pyntip ba u Symbud Myntri Rangbah ba khmih ia ki kam pohiing ula ioh jingtip shaphang katei ka jingkren bad ulah iakren halor kane ka kam bad ula shim ruh ia ki sienjam kiba dei ban shim namar ka hap ban iaid katkum ki kyndon ain.
“Ki riewngeit Khristan kin bitar ia kum katei ka jingkren hynrei kaei kaba ngi dei ban leh kum ki Khristan, ngi dei kiba ngeit ha ka jingiamap hynrei ngam ong, pat ba ngi dei ban klet bad ngam kwah ba na ka liang ka jong ngi ngin leh eiei” ula ong.
