Shillong, Naiwieng 09 : U Myntri Rangbah ka Jylla Conrad K Sangma hynne ka sngi Balang ula ong ba ka jingiakren iasuk kaba pura bad ka kynhun Hynniewtrep National Liberation Council (HNLC) kan sa sdang noh shen.
“Ka jingpynkhreh kala nang iaid bad ngi la kut jingmut shisha. Ki jingiakren kila don, ngi khmih ban nang don bun ki jingiakren ha ki sngi ban wan bad ki Heh Sorkar bad nga kyrmen ba kane ka jingiakren kan sa sdang noh shen” ong u Conrad haba iakren bad ki nongthoh khubor.
U Conrad ula bynrap “Ha ka jingshisha, ka MHA bad u Myntri kam Pohiing dalade, kila iai peingor ia kane ka kam bad ki ruh kila angnud ba ngin lah ban pyniaid ia kane ka jingiakren iasuk shaduh kaba kut”.
Haba kylli, u Conrad ula ong ba ka jingiakren kala iaid bad ki jingpynkhreh ia kiba bun ki kam kila dep lut.
“Ka long kaba eh ia nga ban kren ia kane namar kam long ruh kaba dei hynrei ai ngan ong tang kane ba ki jingialang kila long bunsien para maki ban pynbeit ia ki jingdonkam bad ia ki kyndon kiba dei ban iaid” ula ong.
