Shillong, Rymphang 08 : U Chief Electoral Officer (CEO) Bah FR Kharkongor hynne ka sngi balang, ula pyntip ba ki Pulit ki ladep ban register case halor ka jingkulmar ba mih hapdeng ki nongkyrshan ka TMC bad ka NPP, kaba jia hynnin ka sngi ha Charbatapara bad ka jingtohkit mynta kala iaid shakhmat.
U CEO ula kular ruh ba ki bor pyniaid Elekshon ka District kin ialeh katba lah ban kem ia ki briew kiba donkti ha kane ka jingjia.
“Napdeng ki 131 ngut ki briew ba shah kynnoh, 25 ngut ki dei kiba la shah kem ha ki Pulit bad ia kine sah yn sa kem mynta ka sngi khnang ban lah tehlakam ia kum kine ki jingjia hadien habud” ong u Bah Kharkongor.
Ula pyntip ruh ba ula dep phah ia u SDO(C) bad SDPO ka Dadenggre Subdivision ban leit sha katei ka jaka ba mih ka jingkular ban peitthuh ia ka jinglong jingman. Kin pynlong ia ka flagmarch mynta ka sngi ban pyni ia ka bor jong ka ain.
“Baroh ki Nongpynkulmar kin hap ban soi ia ka bond ba kin long jai jai noh. Ki bor sorkar kin peit thuh bha ia ka jinglong jingman ha ka thain” ula ong.
Hynnin ka miet sngi ba-ar, ki Nongkyrshan jong ka All India Trinamool Congress (AITC) kila mynsaw haka jingkulmar bad ki nongkyrshan ka National People’s Party (NPP) ha Charbatapara, kaba hap hapoh ka Phulbari Constituency, West Garo Hills District.
Kane ka jingkulmar kala jia ha ka por 10:30 baje mynmiet ha ka Iingsah jong u Nozrul Haque bad la kynnoh ba dei ki Nongkyrshan ka NPP kiba leit ban pynkular bad thombor ia ka jingialang kaba la pynlong da ka TMC.
Kat kum ka jingong jong u, kine ki nongthombor ki dei ki briew jong u MDC ka Shyamnagar, Habibuz Zaman, kiba la wan ban kawang maw bad pynpra lut ia ki shuki, ki miet bad ki kynroh siej. U Hoque u don mynta hapdeng ka jingsumar ha Phulbari CHC.
