Shillong, Lber 19 : Ka kynhun ka Tnad Education ha ka sngi Balang, kala pyntip ba ka jinglong jingman ka koit ka khiah jong ki 22 ngut ki Khynnah skul kiba la poi hospital na ka jingngat bih na ka bam ha Karnataka, kala kham biang lait noh tang iwei iba dang don hapoh ka ICU hynrei ha ka jinglong jingman kaba biang.
Ka kyrwoh ka iathuh ba kane ka kynhun kala shong jingialang bad ki bor pyniaid District ka Mandya hynne ka sngi.
Ha ka por mynstep ngi la iadonlang ha ka jingialang bishar kam bala pyniaid da u Deputy Commissioner ka Mandya District lem bad ki kynhun bapher bapher kum ka Tnad Education, Child Welfare Committee, President ka Juvenile Justice, District Backward Officer, Social Welfare Officer, Hostel Nodal Officer, Zila Panchayat Executive Officer lem bad u SP ka Mandya District bad kiwei kiwei, kala ong.
Lah ban kdew ba ka rai bala shim da ki bor pyniaid District ka Mandya ka long ban ai jingiarap ia ki 22 ngut ki khynnah skul na Meghalaya ha ka Rehabilitation Centre lane ka Bala Mandir Centre hapoh ka jingkhmih jong ka Child Protection Officer hadien ba la pyllait ia ki na Hospital. Kine ki Ophisar kin peitthuh ruh ia ka bam ka dih kaba dei ban ai sha ki kat kum ka jingbthah jong ki doktor.
Ka kyrwoh ka pyntip ba kawei pat ka jingmih jong ka jingialang ka long ba namar une u bnai u dei uba ki khynnah ki hap ban ialeh ia ka eksam phainal bad ka jingailad ba kin ioh iakhun ia ka eksam kan dei ka kam kaba hakhmat eh jong ki bor pyniaid District bad kan khmih ba kin lah ban iakhun ia kane ka eksam jongki ha Bala Mandir Centre.
“Hadien ka jingialang bishar kam ha Dc Office, la pyntip sha ngi ba u Chairman ka Karnataka State Commission for Protection of Child Rights u kwah ban iakren bniah bad ka kynhun na Meghalaya bala pynbud da ka jingleit jurip lang ia ka skul kaba jia kane ka jingjia” iathuh ka kynhun na ka tnad Education.
Hadien bala dep ka jingleit jurip, u Chairman ka KSP for Protection of Child Rights ula leit sha Hospital kaba ai jingsumar ia kine ki khynnah skul ha ryngkat u DC ka Mandya District bad kiwei kiwei ki heh Ophisar, kila pyntip.
Ha ka sngi Ba-ar, ka kynhun kala iakynduh ia ki bor pyniaid District bad pan ia ka jingiarap jong ki ha kaban ai ia ki jingtip halor ka jingiaid jong ka case bad ki sienjam bala shim ban pynthikna ba kan don ka jingtohkit, ia kaba kila mynjur ban sa ai ia ka kaiphod sha ka Sorkar jong ki bad kumjuh ruh ia ka kaiphod halor ki jingkem ia ki briew nalor ka ekahar, ka thup kyrteng ki khynnah skul ba shah ktah, ka test ia ka bam ba ai sha kine ki khynnah bad kiwei kiwei.
U ADC ula thung ia u Deputy Director ka School Education kum u Nodal Officer ban iarap ia ka kynhun ha kane ka jingtohkit.
