Shillong Naiwieng 26: Ka United States Consulate General Kolkata bad ka Observer Research Foundation (ORF), kila pyntip ba kin pynlong ïa ka Meghalaya Chapter kum shi bynta jong ka projek kaba dang ïaid shakhmat kaba 18 bnai jongka United States Indo-Pacific Strategy: North-Eastern Dialogues (USIPS NED) ha ka 26 tarik Naiwieng 2024 ha Shillong.
Kane ka jingïalang ka ban long ha kylleng ka thaiñ shatei lam mihngi jong ka ri India ka dei ban pynsngewthuh halor ka US Indo-Pacific ha ka thaiñ shatei lam mihngi jong ka ri India bad ka kam na ka bynta ban kyntiew ïa ka khaii pateng, ka lad pyniasoh, ka jingpynduna ïa ka jingkylla ka suiñbneng ha ka thaiñ, da kaba ïatreilang hapdeng ka ri India bad US.
Ka Meghalaya Chapter ka lum ia ki 37 ngut ki nongshimbynta na kylleng ka thain shatei lam mihngi kiba don ha ki liang bapher bapher kum na ka sorkar, ki kynhun khaii pateng, sengbhalang, riewshemphang, seng treimon sngewbha, ki lad pathai khubor, ki nonghikai bad ki samla pule.
Na kine ki 37 ngut ki nongshimbynta; 27 ngut kila wan ban iashimbynta hi dalade katba 10 ngut kila shu pynïasoh ialade da ka kor digital. Ki nongwan iashimbynta kiba pawkhmat ki kynthup ïa u Sampath Kumar u Principal Secretary ka tnad Forest and Environment ka Sorkar Meghalaya, u Reiwad Wajiri uba long u Ambassador barim jong ka ri India bad u nongkitkam jong ka Dellow Asian Confluence, Meghalaya, u Nilanjan Ghosh u Director Observer Research Foundation bad kiwei kiwei.
Kane ka jingialang kaba shi sngi kala pynleit jingmut ha ka jingkhmih bniah ia ka jingpyniasoh da ka met bad da ka kor digital ha ka thain, khamtam eh ha kaba iadei bad ki jingtei kiba kongsan kiba pynïasoh ïa ka thaiñ Shatei Lammihngi sha ka Indo-Pacific lyngba ka Bay of Bengal. Da kaba pyrkhat ïa ka jingshah ktah ka thaiñ na ka jingkylla ka suiñbneng, kane ka jingïakren halor ka Meghalaya bad ka projek kaba 18 bnai, kan pynpaw shaphang ki kam pynroi kiba lah ban neh bad kyrda na ki jingma kiba ïadei bad ka jingkylla ka suiñbneng bad ka jingpynleit jingmut kan long ban kyntiew ïa ka roi ka par kaba neh ia ka thaiñ.
U Nilanjan Ghosh ula ong, “Ka USIPS NED Meghalaya Chapter, ka long kumba ka pynïasoh ïa ka jingïadei hapdeng ka roi ka par bad ka jingling jingman jong ki sawdong sawkune. Ka jingthmu ka long ban wanrah ia ki lad kiba thymmai ha ka khaii pateng, ka jingpyniasoh, ki jingtei kiba kongsan bad ka jinglah ban shah ia ka jingkylla ka suinbneng kiba iadei bad ki jingthrang jong ki paidbah ka thain shatei lammihngi bad ban sngewthuh kumno ka U.S Indo-Pacific Strategy ka lah ban noh synniang sha kane ka bynta.
U Sampath Kumar ula pynpaw ba, “Ka US-IPS NED Meghalaya Dialogue ka don ïa ka jingmut kaba kyrpang namar ngi ïohi ïa ka jingïadei jong ki jingïatreilang bad ki jingkitkhlieh kiba lah ban pynroi ïa ka jingshimkhia na ka bynta ka roi ka par baroh kawei jong ka thaiñ. Kane ka Dialogue ne ka jingiakren kan long ka nongrim ban pyllait ia ki jinglah ia ki projek pynroi kiban sa wan bad ka kamram jong kine ki jingiakren ka long ban ai ia ka jingling jingman kaba lah ban kyntiew ia ka jingroi, khamtam ha ki samla, namar 49% na ki nongshong shnong jong ka Meghalaya kidei kiba dang don hapoh 18 snem ka rta, kaba pynlong ia ka jingdonbynta jongki samla kaba kongsan bha, ha kaba noh synniang ban pynlong ia ka Shillong ban ioh biang sa shsien ia ka dur kum ka nongbah kaba stad.”
Da kaba kyntiew ia ka jingiakren bad jingiatreilang hapdeng ka India bad ka US, ka projek kan wad ia ki lad ki lynti ban pyndonkam ia ka bor jong ka thain shatei lam mihngi jong ka ri India, ban kyntiew ia ka thain bad ban ialeh pyrshah ia ka jingkylla ka suinbneng.
Ki nongiashimbynta kila pyndap ruh ia ki jingkylli kiba long kum ka jingleh sorbe, ban tip la kila don lypa ia ki jingtip halor ka U.S. Indo-Pacific Strategy bad ka jingthmu ban don iaka jingïatreilang hapdeng ka India bad ka US ha ka khaii pateng bad ka jingkylla ka suiñbneng ha ka thaiñ shatei lam mihngi.
