Shillong, Nohprah 02: Ka kynhun jong ki nongtrei Anganwadi hynne ka nsgi kila leit ia kynduh ia u Sampath Kumar u Development Commissioner bad Principal Secretary ka tnad Social Welfare ban pynpaw ia ka jingsngewkhia halor ka jingslem ban pyllait iaka jingsiew ka jongki ne ka honorarium.
Katei ka jingpynslem kala buh ha ka jingeh kaba khraw iaki nongtrei Anganwadi, kiba don ia ka bynta kaba khraw ha kaban shakri ia ka imlang sahlang baroh kawei.
Da kaba shimkhia mardor ia ka kam, u Principal Secretary ula bthah ia u Joint Secretary ka Social Welfare ban khmih bniah noh mardor ia katei ka kam.
Ha katei ka jingkhmih bniah la shem ba ia ka bhah tyngka naka bynta ka honorarium haduh u Nohprah 2024 lah dep ban bhah sha ki Child Development Project Office (CDPO) katkum ki kyndon treikam. Katba naka bynta ki bnai jong u snem mang tyngka 2024-2025, ka tnad Finance kala dep ban pyllait ia ka pisa kaba donkam sha ka tnad Social Welfare bad ki jingpynkhreh kila iaid shakhmat ban pynthikna ba katei ka pisa kan poi sha man la ki CDPO ha ka taiew ba nyngkong jong u bnai Nohprah 2024.
Ban pynthikna ba kane ka jingsiew kan long ha ka por kaba biang, u Myntri Rangbah ula bthah ba ia baroh ki jingsiew dei ban pyniaid shakhmat bad ban pyllait noh sha ki nongtrei Anganwadi Worker bad Helper hapoh ka 7 tarik man la ka bnai. Nalor kane, u Joint Secretary yn khmih bniah halor ka jinglong jingman ha ka jingsiew ia ka Honorarium ha ka 8 tarik man la ka bnai bad ban aiti ia ka kaiphod kaba pura ban pynthikna ia ka jingbuh jingkhein halor ka pisa pilain.
Da kaba shim lypa ia ka sienjam ba ka lah ban mih ka jingslem na kid aw ki bym lah kiar, kum ka jingbym don ia ki nongtrei ha katei ka por ba pyniaid ia ki kam, baroh ki CDPO kila ioh ia ka jingbthah ba kin wad ia ki lad ki lynti ban pynkhreh ia ki jingdonkam khnang ba yn lah ban siew ha ka por kaba dei ia ka jingsiew.
Ka jingshim ia katei ka sienjam ka long da ka jingthmu ban pynneh ia jingai jingkyrshan pisa ia ki nongtrei Anganwadi kaban ym don kano kano ka jingthud.
Ka tnad Social Welfare kala kubur ruh ia ka jingtrei shitom jong ki Nongtrei Anganwadi bad ka iengskhem ban pynbeit ia kino kino ki jingeh ban pynthikna ba kan don ka jingiaid beit iaid ryntih jong ka kam ha ka jingai jingshakri ia ka jylla baroh kawei.
