Shillong, Jymmang 01: U Symbud Myntri Rangbah ka jylla ba khmih ia ka tnad pynroi sor bah Sniawbhalang Dhar, ula iathuh ba ka sorkar kala dep ban pyntip shaka ïingkashari halor ka jingkyntait ka Harijan Panchayat Committee (HPC) iaka Blueprint lane ka Plan ban pynkynriah iaki ba sah ha Them Metor, Them Iew Mawlong.
Haba kren sha ki lad pathai khubor u bah Sniawbhalang ula ong ban aka liang ka sorkar jylla kam lah ban pynurlong iaki jingdawa ka HPC khamtam haba iadei bad ka jingdawa ban siew mar T.20 lak sha kawei la longïing bad ka jaka kaba 2000 Sq ft.
U bah Sniawbhalang ula ong ba ka sorkar kam lah ban iakren biang iaka Blueprint baka sorkar ka tyrwa namar haduh mynta ka HPC kam shym la pdiang satia ia kane ka Blueprint.
“Ka HPC ka khlem pdiang satia iaka Blueprint jong ka sorkar halor ka jingthmu ban kynriah iaki ba sah ha Them Iew Mawlong bad naka liang ka sorkar kala pyntip sha ka ïing kashari, kumno ban iaid shakhmat halor kane ka kam” la ong u bah Sniawbhalang.
U bah Sniawbhalang ula ong ba naka liang ka sorkar ka kloi ban iakren biang hynrei haduh mynta ka HPC kam shym la phah ktieng ban wan shaka meij iakren bad dei namar kane ka sorkar ruh kan ap iaka jingbthah ka ïing kashari.
