Shillong, Iaiong 20: Ka Myntri ka tnat ka koit ka khiah ka kong Ampareen Lyngdoh hynne ka sngi kala pyntip ba ka jingdon kiba ioh pang Covid-19 hapoh Meghalaya ka dang dei kaba lah ba tehlakam.
Haduh mynta ka sngi, ki don 5 ngut kiba ioh pang COVID thymmai bad baroh kiba dang don hapdeng ka jingpang ki long 15 ngut bad napdeng kine 2 ngut kila ioh ka met kaba koit ba khiah.
Haba pyntip ba ka don ka jingkiew ka jingpang ha West Garo Hills, ka kong Ampareen kala iathuh ba ka sorkar kam kwah ban wanrah ka jingkulmar ha ka jingmut jingpyrkhat iaki paidbah haba iadei bad kane ka jingpang.
“Ka sorkar ka kyntu iaki paidbah ba kidei ban bud ryntih iaki jingbthah ka tnat ka koit ka khiah khamtam haba iadei bad ka rukom iada ialade na kane ka jingpang. Kino kino kiba wanphai na ki jylla ba jur ka jingpang COVID kidei ban set slung ialade hala ïing, kala ong ruh ba ka Kad Lengsuin Umroi kam dei thain kaba bun ki Lengsuin kiba wanphai hynrei watla kata ruh ka sorkar kam kwah ban pynkulmar kai iaki paidbah hynrei haduh mynta kiba dang don hapdeng ka jingpang hapoh ka jylla ki don 15 ngut” la ong ka kong Ampareen.
Ka kong Ampareen kala ong ba ki paidbah kidei ban husiar haba iadei bad ka rukom iaid rukom ieng ha ki jaka paidbah, “Ngi la iohi kumno ka jylla ka iakhun pyrshah iaka khlam COVID ha ki snem ba dep bad mynta ka kynti ruh ki paidbah kidei ban iatreilang bad ka sorkar kumno ban iakhun pyrshah iaka khlam daka bud ryntih iaka jingbthah ka tnat ka koit ka khiah”.
Kala iathuh ba dang shen ka sorkar ka iakren bad u myntri ka tnat ka koit ka khiah ka sorkar pdeng, bad ka sorkar jylla kala pan jingiarap ruh khamtam haba iadei bad ki dawai injection hynrei haduh mynta ka sorkar pdeng kam pat jubab iaka jingdawa ka sorkar jylla.
Shuh shuh kala iathuh ba dang shen haka 12 bad 13 tarik mynta u bnai ka sorkar jylla kala pynlong iaka Drill kumno ban leh lada wan lynshop biang ka khlam COVID hapoh ka jylla bad kumno ban pynsngewthuh iaki paidbah haba iadei bad ki lad jingiada.
Nalor kane ka myntri ka tnat ka koit ka khiah kala iathuh ba haduh mynta ka jylla kam pat ioh satia iaki injection booster dose ban iada naka jingpang COVID bad mynta ka kynti ka sorkar jylla ka dang ialeh ban ioh ia kine ki injection.
“Ki don bun ngut ki bym pat shim iaka Booster Dose hynrei nga tip ki don bun kiba la shim namar ki don kiba hap ban leit sha kiwei pat ki jylla naka bynta ki jingdonkam hynrei watla katta ruh nga pyntip sha ki paidbah ba haduh mynta ka jingpang COVID kam dei kaba jur hapoh ka jylla bad haduh mynta ka sorkar ka dang lah ban tehlakam” kala ong.
