Shillong, Nailur 21: Ka tnat Pule Puthi ka Jylla kan rah sha ka jingialang jong ka kynhun Myntri Sorkar ia ka jingtyrwa ban ai jingithuh noh kum ki nongtrei sorkar iaki 12,541 ngut ki nonghikai SSA ha ka Jylla.
Ia kane la pyntip da u President ka Meghalaya SSA Schools Association (MSSASA)u Bah Aristotle C Rymbai hadien ba la wai ka jingialang General Executive Council jong ka Association hynne na sngi.
“Hadien ka jingiakynduh jong ngi ia u Director ka tnat Pule Puthi u ba dei ruh u State Project Director jong ka SSA, Swapnil Tembe ha ka 10 tarik u Nailur bad hadien ba ngi la ia kynduh ia u Commissioner & Secretary Vijay Mantri ha ka 19 tarik u Nailur, baroh 2 ngut ki la pyntip sha ngi ba ka Sorkar Jylla ka dang pynkhreh ia ka Cabinet Memorandum na ka bynta ban ai jingithuh ia ki jingshakri lane ban pyniasoh lang ia ki nonghikai SSA na ka State Implementation Society sha ka tnat Pule Puthi” la ong u Bah Aristotle.
U Bah Aristotle u la iathuh ba ki mat ba iadei bad ka jingdawa ban pynkiew tulop bad ban pynlong ryntih ia ka jingshakri jong ki nonghikai SSA la rah ha kane ka jingialang jong ka GEC.
“Hadien ka jingïakren kaba la neh la jan 3 kynta, ngi la rai da kawei ka sur ban jied iaka jingioh jingithuh ïa ki jingshakri jong ngi bad ngi la rai ban rah ïa kane ka mat ha ka jingïalang bah jong baroh ki nonghikai SSA ha Meghalaya, ka ban long ha u bnai Risaw ha Madan Student, Jaiaw.”
Kumta ngi kyrpad ïa baroh ki nonghikai SSA ba kin ïa poi sha katei ka jingïalang khnang ba ngin lah ban shim ïa ka rai kaba khatduh halor kane ka kam” u la ong.
