Nongpoh, Naiwieng 07: Ka kynhun ki nongrah nar ka jylla ba la tip kum ka Meghalaya Weightlifting Association, ka la pynthymmai ia ki nongkitkam kiban treikam ban nang pynkhlain ia ka jingpynmih ia ki rang bad ki thei donsap ha kane ka jingialehkai rah nar kaba la bna nam hapoh ka ri India hi baroh kawei.
Ki nongkitkam kiba thymmai kiba la shah jied ban pyntyllun ia ka kam jong ka Meghalaya Weightlifting Association ki kynthup ia u Bah Donald Rymbai u ba la shah jied kum u President, Bah Flanagan Kharwanlang, Bah Batskhem Basawiamoit kum u General Secretary nalor kiwei kiwei ki nongkitkam.
Haba kren bad ki Nongthoh Khubor u Bah Donald Rymbai, kum u President ba thymmai jong kane ka synjuk, u la pynpaw ia ka jingkmen kaba khraw ban ioh ban shimti ia ka jingkitkhlieh ban nang pynkhlain ia ka kynhun ki nongrah nar na ka bynta ban kyntiew ia kane ka jingialehkai hapoh ka jylla kaba la ioh ruh ia ka jingithuh ha ka thup jong Olympic bad ban nang sei shuh shuh ia ki rang bad ki thei kiba donsap ha kane ka kam ialehkai rah nar da kaba ai khublei kyrpang ruh ia ki nongialam barim jong kane ka synjuk kiba la trei borbah naduh u snem 2018 ter ter.
U la pynpaw ruh, ba ka jingdon jong ki rang bad ki thei ialehkai rah nar ka District Ri Bhoi ka dei kawei kaba la lah ban sei madan bad kiba la lah ruh ban khur takma ha ka North East Games bad la phah ruh ban ia shimbynta ha ka Meghalaya Games da ka jingiatreilang bad ka synjuk jong ka Meghalaya Olympic ha kaba na ka liang ka Meghalaya Weightlifting Association ka da sngewnguh shikatdei ia ka Meghalaya Olympic kaba la iai kyrshan ia ki na kawei ka por sha kawei pat.
“Ngi donkam ban pynkhlain ia kane ka synjuk ki nong rah nar bad ban nang sei ia ki rang bad ki thei donsap ban kyntiew ia ki ban ai jinghikai kiba kyrpang ban tip ia ki rukom ialehkai bad ki jingdonkam, ki buit bad kiwei kiwei lyngba ka jingiatreilang ruh bad ki nonghikai kiba la ioh ia ka jingpyntbit kaba paka ha kaba ia mynta ka jingpyntbit ka don tang hapoh SAI bad ka Don Bosco bad ha Don Bosco u nonghikai u dei hi u ba na Ri Bhoi District”, pynpaw u Bah Donald Rymbai.
Shuh shuh ruh, u la pynpaw, ba kum ka synjuk hi kan trei borbah ban leit mih sha man ki district jong ka jylla Meghalaya ban wad ia ki rang bad ki thei ialehkai rah nar ban ai jinghikai pyntbit bad ban thaw ruh ia ki kynhun ha kine ki district ban kyntiew ia kane ka kam ialehkai rah nar.
Pule lang ia kane: Bat ki Pulit haduh 119 tylli ki kali ba pyndait exhaust pipe khyllah
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
