Nongstoiñ, Ïaïong 11: U Sordar ka Shnong Umiap Bah Wondar Lyngkhoi, ula pynthikna ba ka Shnong ka thaw kala don ia ki dulir bad ki kot ki sla kiba donkam ban pynthikna ba ka shnong Umiap kaba hap hapoh ka Langpih Sector, ka dei kaba dang hap hapoh u pud u sam jong ka Jylla Meghalaya ym sha Assam.
Une u Sordar ula lum ia ka jingialang paidbah hynne ka sngi ha Umiap kaba la iashimbynta naduh ki rangbah, ki longkmie, ki samla haduh ki khynnah ban pynshai ba lada ka Sorkar Meghalaya kan khynniat jubor ia ka shnong sha Assam, ki Nongshongshnong ha ryngkat bad baroh ki shnong Khasi kiba hap hapoh ka Langpih Sector, kin pynlong ia ka jingiakhih ba tyngeh.
Une u Nongialam Shnong ula kyntu ia ki nongshongshnong ba kim dei ban sheptieng ia ka jingiapynbeit pud jong ka wat ba-ar hapdeng ka Meghalaya bad Assam namar ka Dorbar Shnong kala dep ban pynbit pynbieng ia ki dulir bad ki kot ki sla ban pynshisha b aka Shnong ka dang hap hapoh Meghalaya.
U la ong ba katkum ki dulir ba ka dorbar shnong ka la aiti sha ka sorkar, la kdew shai ba ka shnong Umyiap ka la don naduh u snem 1970 mynba ym pat ïoh ïa ka jylla ba pura. Nangta ha u snem 1972, u Syiem ka hima Rambrai u la pynskhem ïa katei ka shnong da kaba ai sanad ïa u sordar bad registar ruh ïa u pud shnong.
Hadien kata ha u snem 1990 ka District Council ka la pynrung ïa katei ka shnong ha ka land record bad ha u snem 2009, ka shnong ka la ïoh ruh ïa ka jingithuh na ka revenue department jong ka ophis u Deputy Commissioner ka West Khasi Hills. Kumta lada ka sorkar Meghalaya ka khynñiat jubor sha Assam ki paitbah kin ym aili satia.
U bah Lynkhoi u la ong ruh ba baroh ki shnong Khasi ba kynthup naduh Nongmawleiñ, Ïewnongma, Mawlan, Langpih Umtap, Madanjaïaw, Langpih, Umwali, Mawdiangsnam, Domtiewaw, Umwahsiang, Mawsikar, Umyiap, Umbyrsit Umpha, Nongma, Nongmawlong bad kiwei kiwei ki shnong, ki la pynkhreh ïa ki jingthoh jingtar kiba biang ban aiti ha ki nongïalam jong ka Regional Committee on Border Dispute ynda ki la wan ban jurip ïa katei ka thaiñ.
U bah Slikshon Hoojon sordar barim jong ka shnong, u la pan jingshai na ki paitbah la ki kwah ban sah ha Meghalaya ne ki kwah ban leit sha Assam, ha kaba baroh ki paitbah naduh ki rangbah, ki longkmie, ki samla haduh ki khynnah ki la pynsawa tang kawei ka sur bad kaba ong ba ki kwah ban don beit ha Meghalaya.
