Shillong Naitung 26: U MLA ka Nongpoh Constituency u Bah Mayralborn Syiem uba long ruh u dkhot jong ka Ri Bhoi District Regional Committee, hynne ka sngi Balang ula ong, ba ka sorkar jylla kan shim ia ki sienjam na ka bynta ka bha ka miat jong ki paidbah halor ka jingiakren pynbeit pud bad ka Assam ha ka wat ka Baar.
“Da kaba buh ha ki jingmut jingpyrkhat, kaei kaei kaba ngi leh kan long na ka bynta ka bha ka miat jong ki paidbah, kane kadei ka jingthmu bad ka jingthrang jong ka Regional Committee hapoh ka jingialam u Chairman Bah Prestone Tynsong uba long ruh u Symbud Myntri Rangbah ka jylla. Ngin iaid shakhmat da ka jingmut kaba bha bad ngin sa shim ia ki sienjam bad kaei kaei kaba ka Regional Committee kan ai jngmut sha ka sorkar jylla kan dei naka bynta ka jingmyntoi jong ki paidbah” ong u Bah Mayralborn Syiem.
“Katba ngim pat leit jurip hi ia ki shnong ki thaw ryngkat bad ka Regional Committee na Assam, ngin ym pat lah ban ong eiei ia mynta hi, hynrei ngin pynthikna ba kaei kaei kaba ngi leh kan dei na ka bynta ka bha ka miat jong ki paidbah” ula ong.
U MLA ka Nongpoh ula iathuh ruh ba ki Regional Committee na baroh ar tylli ki jylla kin sa shong jingialang biang ha ka 25 tarik u Nailar bad ha ka 26 tarik pat kin leit ban jurip ia ki jaka kiba don ha ka thain Deshdomreah.
Ula iathuh ruh ba ka jingpynbeit ia u pud u sam ha ka wat ka baar ki kynthup ia ka Deshdomreah, Block – II, Borduar bad ka Nongwah Mawtammur bad ka Regional Committee jong ka Ri Bhoi kan sdang ia ka jingiakren pynbeit pud na ka Deshdomreah bad kan sa bud sa ka Nongwah Mawtamur bad ka Borduar.
