Shillong Naiwieng 26: U Symbud Myntri Rangbah ka Jylla Bah Sniawbhalang Dhar ula pynpaw ia ka jingdonkam ban leh da ka lynti kaba jai jai ban pynkynriah ia ki nongdie madan haba banjur ba kan ym don kano kano ka jingleh kyrkieh ban pynkynriah ia ki.
“Ngi dang don ha ka kam, dang hynin ka sngi, nga lah don ia ka jingialang bad ki ophisar ban ithuh ia ki jaka kiba thymmai (ban pynkynriah ia ki nongdie madan) na kiba bun ki jaka” ong u Bah Dhar haba iakren bad ki nongthoh khubor hynne ka sngi Baar.
Ula ong, ba ka jingpynriah ia ki nongdie madan na ki jaka kum ha Laitumkhrah bad GS Road yn sa leh ha kata ka rukom khnang ba kan ym ktah ia ka kamai kajih jongno jongno ruh.
“Ngi ngim kwah ban pynduhlad iano iano ruh, namar ba kidei hi ki briew ki jong ngi. Kam long kaba suk ia ka sorkar ban shu bret ia la ki briew. Kumta, hashwa ba ngin pynkynriah ia ki, ngi hap ban ioh shwa ia ka jaka kaba biang bha” ong u Bah Dhar.
Ha kaba iadei bad ka jingthmu ban pynkynriah ia kiba shong basah ha Them Iew Mawlong, u Symbud Myntri Rangbah ula ong “Ngi lah jan ban pynlong sa ia kawei ka jingialang. Kane ka dang sahkut hapoh ka iingbishar, ka jingtian bishar ia kane, ka lah ban long ha kano kano ka por, hynrei ngi na ka liang jong ka sorkar ngi lah leh iala ka kamram (ban pynbeit noh mardor ia kane ka mat)”.
