Shillong, Iaiong 25: U Symbud Myntri Rangbah ka jylla uba khmih ruh iaka tnad Kam Pohiing Bah Prestone Tynsong hynne ka sngi Ba-ar, ula ong ba ka sorkar jylla kan pynthikna ba ka “Zero Level” (bym don kyrdan shuh) ka dei ban don ha baroh kawei ka jylla bad yn leh da kaba tyngeh pyrshah ia kiba tih bad khaii be-aiñ ia u dewiong.
“Ka jingthmu jong ka sorkar ka long kaba shai kdar, la kadei ka sorkar kaba la dep ne ka sorkar kaba thymmai bad nga la kren da kaba shai, ba kata ka kynhun “High Level” kam dei ban don bad ha ka jingshisha katei ka kynhun kam shym la don satia bad ngan pynthikna ba ka Zero Level ka dei ban don ha baroh kawei ka jylla Meghalaya” ong u Bah Tynsong haba iakren bad ki nongthoh khubor.
Dang shen u President ka Meghalaya Pradesh Congress Committee u Bah Vincent H Pala ula iaroh ia u Bah Tynsong halor ka jingshimkhia ban pynduh jait iaka “high-level”, ia kaba la kynnoh ba kadei kaba la donkti ha kaban pyniaid iaka jingkhaii be-aiñ ia u dewiong ha ka jylla.
Ha kaba iadei bad ka hukum kaba la pynmih da ka iingkashari ban buh ia 10 kompani ki Central Armed Police Force (CAPF) ban kem ia kiba khaii ia u dewiong uba la tih be-aiñ, u Symbud Myntri Rangbah ula ong ba ka sorkar jylla kala dep phah da ka jingthoh iaka sorkar pdeng ha ka por bala dep katkum ka jingbthah jong ka iingkashari ban pynbiang iaka jingai jingshakri da ki Central Industrial Security Force (CISF) bad mynta da ki CAPF.
“Ngam tip, la ka sorkar pdeng kan lah ne em ban pynbiang ia ngi ia ka jingai jingshakri jong kitei ki briew. Kumta ia mynta hi ngam pat lah ban ong eiei” ong u Bah Tynsong.
U Symbud Myntri Rangbah ula kam ruh ba kam don shuh ka jingkhaii ia u dewiong ha ka jylla.
“Kino kino kiba donkti ha kaban khaii be-aiñ ia u dewiong ha ki surok, kin shah kurup bad shah kem lut katkum ki kyndon aiñ” ong u Bah Tynsong.
Haba kylli la dang donkam iaka jingshakri jongka CAPF, u Bah Prestone ula ong, “Ym dei ban ianujor iaka hukum jong ka iingkashari bad iaka kamram jong ka sorkar jylla. Kumba nga ong, ngi don hangne ban pynthikna ba kino kino ki jingkhaii ne jingtih dewiong be-aiñ kim dei ban jia shuh hapoh ka jylla baroh kawei”.
