Shillong, Nailur 21 : U Symbud Myntri Rangbah ka Jylla Bah Prestone Tynsong hynne ka sngi Balang ula ong ba ka Sorkar Jylla kala dep kren shai kdar ba la rai pynsangeh noh ia ka jingthmu ban wanrah ia ki casino hapoh ka Jylla.
Hynrei u ong ba ka jingpyndam ia ka Meghalaya Regulation of Gaming Act, 2021 kan mut pat ba kan ym don shuh kano kano ka jingteh kyndon ia baroh ki jait kam khalai hapoh ka Jylla.
Haba iakren bad u nongthoh khubor, u Bah Prestone ula ong “Lada ki kynhun bapher bapher ki ong em, ka mut em. Lada phi iakren ia ka jingioh lum khajna, hooid ka dei ka jingshisha ba lada ngi buh casino kan don ka jingmih khajna hynrei ha kajuh ka por ngi hap pat ban burom ia ka jingsngew jong ki nongshongshnong ka Jylla. Ta ka daw u Myntri Rangbah ka Jylla ula kren shai kdar ba ngi la pynsangeh noh ia ki casino”.
“U Myntri Rangbah jong ngi, ula dep kren shai hapoh ka Iingdorbar bad kano kano kaba la kren hapoh ka Iingdorbar ka dei kaba long official bad ym don ba lah ban tynjuh ia ka. Ha kato ka sngi, u Myntri Rangbah ula ong ba ka jingtywa ban buh ia ka casino kan sa shu iap hi bad ki Provisional Licence kin sa iap noh ha ka 28 ne 29 tarik Nailur” ula bynrap.
Halor ka jingdawa ban pyndam noh ia ka Gambling Act, u Bah Prestone ula ong balei ba ka Sorkar kan hap pyndam noh ia ka Gaming Act.
“Baroh ki kam khalai ki dei kiba beain, ngi hap ban the kyndon, donkam ka jingteh kyndon, ka ain ka long kaba donkam ban hap don” ula ong.
Nalor kane, u Symbud Myntri Rangbah ula ong ba ki paidbah kila ieng pyrshah tang ia ka jingbuh casino ym ia ka Gambling Act.
“Lem kumta phi mut ban ong ba phi long pyrshah ia ka jingthoh tim kaba la don mynta da ki phew phew snem bad ha kato ka por balei phim ia pyrshah? Ka long ruh kumjuh ia ka jingiadur masi, ka jingiakop khwai dohkha, ka jackpot kiba don bad kaei kaba ka sorkar ka leh, ka long ban teh kyndon ia ki da kaba wanrah ia ka Ain ba kim lah ban leh kat kaba ki mon hynrei ki dei ban teikam hapoh ki kyndon” ula ong.
Shuh shuh, u Bah Prestone ula ong ba ka jingkylli kam mih satia ba iaid lait ia ka Kynhun Myntri haba phai sha ka jingthung ia u Chairman bad ki dkhot jong ka Gaming Commission bad ban pyntreikam ia kane ka Ain.
