Shillong, Naitung 19 : U Symbud Myntri Rangbah Bah Prestone Tynsong, ula pynthikna ba ka jingkieng thymmai ba dang shna mynta hakjat ka pung Umiam, ka dei kaba la pynwandur ba kan long kaba shngain bha kynthup ka jingma haba pyllait um napoh ka pung umiam.
Ka jingkieng, bala pyntrei da ka PWD kumba 100 meter sharum ka pung Umiam, kala pynkhuslai ia ki paidbah ia ka jing shah tap ha ka um ha ka por ba pyllait um napoh ka pung Umiam.
Halor kane, u Bah Prestone uba khmih ruh ia ka tnad PWD (Roads), ula ong ba ka Tnad kala dep shong bishar bin pa bin ia kane ka kam hashuwa ban sdang pyntrei ia ka project.
“Hooid, ngi la dep leh ia kane. Ngi la dep pynlong ia ka jingshong bishar kaba bniah bha bad u architech bad designer jong ngi, kila shimkhia ia baroh kine kiei kiei” ula ong haba bynrap “Ngi la kyntiew ia ka jingjrong jong ka jingkieng kaba dang pyntrei mynta”.
U Bah Prestone ula iathuh ruh ia ka jingiaid shaid shaid ka surok thymmai ba pyniasoh na Mawlai Bypass sha Umroi. U pyntip ba ki jingkieng kiba mih ha kane ka surok kila jan dep kumba 90%.
“Ka thong jong ngi ka long ban pyndep ia ki hapoh u Nohprah. Hynrei lada ngim lah, khlem pep ngin pyndep hashuwa u bnai Lber jong u snem ban wan. Ka surok ka dei ruh ban long kaba la biang nadong hadong ban pyndonkam noh” ula ong.
