Shillong, Nailar 26: Haba kynthoh ia ki jingsngewkhia halor ki kam kaikhlaw ha Jylla, u Myntri Rangbah Conrad K Sangma, u la pynpaw ba watla ki jingtip ba la lum na ki tnad syntiat ki pyni ba ki kam bapher bapher ki dang ïaid shakhmat, hynrei ka dang kloi palat ban pynkut ba ka la don ka jingialum kynhun biang jong ki riewkiangatiar.
Katkum ka jingong u Conrad, ka jinglong jingman ha ka thain khappud bad ka ri Bangladesh kala kylla bha ha kine ki snem kiba la leit, kaba la wanrah ia ki jingkylla kiba mih kiba donkam ban buddien bha.
Haba iakren bad ki nongpathai khubor ha ka sngi Ba-ar, u Conrad ula ong ba ka sorkar kala ioh pdiang ia kiba bun ki jingtip na ki tnad syntiat man la ka sngi, ia kaba donkam pat ban pynshisha bad pynthikna hashwa ban ai kano kano ka jingkren pynkut halor kitei.
Kila don katto katne ki kynhun kiba la sdang treikam ha ki snem kiba la dep bad ka long thik kum ki kynhun jong ki nonglute ym kum kita ki kynhun kieng atiar.
“Ngi hap ban sngewthuh bad ban kynmaw ia ka jinglong jingman ha kylleng ki thain khappud bad ka ri Bangladesh kam long shuh kumjuh kumba ka long ha u snem ba la dep. Kumta kan don beit ka jingthmu bad nga ngam pat kwah ban kren eiei than namar ba kadei ka mat jong ka jingshngain ia ka ri. Kumta ngam lah ban kren ne ai ia ki jingtip, hynrei kaei kaba nga lah ban ong, ka long ba ki don katto katne ki jingjia kiba jia bad ki don kiei kiei kiba pher ha kylleng ka thain khappud kila sdang ban mih kiba la pynkylla ia ka jinglong jingman baroh kawei” ula ong.
“Mynta ban ong ba kala don biang ka jingialum kynhun ki riewkiengatiar, em ngim lah ban ong kumta ne ban shu pynkut kumtei, ka bym lah long hynrei ngi la ioh ia ki jingtip na ki tnad syntiat shaphang ka iaid ka ieng, hooid ngi lah ioh. Man la ka por ba ngi ioh, ngi pyrshang ban wad ia kaei kaba jia bad ngi la lap ba ki don 2-3 tylli ki kynhun, kiba dei ki kynhun nonglute bad katei ka lynnong kala kut noh hi hangtei. Ki tnad syntiat ki wan man la ka sngi hynrei ban pynkut da kaba ong, ba kila ialum biang kam long satia kaba dei” ong u Myntri Rangbah.
U Conrad Sangma ula pynthikna ba ka sorkar ka kut jingmut ban iai bteng ha ka ban khmih bniah bad peitngor ia ka jinglong jingman bad ban shim ia ki sienjam kiba donkam ban pynthikna ia ka jingsuk bad jingshngain ha ka jylla.
Ha kaba iadei bad ka jingkren jong ka DGP, u Myntri Rangbah ula ong “Nga tharai ka DG ka pyrshang ban kren thik kumba ngi la ioh ia kitei ki jingtip bad nga tharai ba ki nongthoh khubor ha katei ka por kila shim thik tang ia ka bynta kaba nyngkong bad kim shym la kren eiei shaphang ka jinglong jong ka dur baroh kawei. Kumta nga la ai ia phi ia ka dur ka dar kaba pura, ngi ioh man la ka sngi ia ki jingtip na ki tnad syntiat bapher bapher. Kine ki jingtip ha ki kyrdan bapher bapher ki donkam ban pynshisha bad katba ngim pat lah ban pynshisha, ngim lah ban kren pynkut ba kila sdang ban ialum biang hynrei lada ong ba ngi ioh pdiang ia ki jingtip, kadei pat kaba shisha ba ngi ioh pdiang ia ki jingtip man la ka sngi”.
“Mynta ka jinglong jingman ka long kaba don jingma namar ka jinglong jingman hapoh ka ri Bangladesh bad kumta kitei ki jinglong jingman kidei kiei kiei kaba ngi hap ban bteng ban khmih bad peitngor bha. Kane ka dei ka kaei kaei kumba ka long mynta” ula bynrap.
