Shillong, Nailur 07: U Myntri Rangbah ka Jylla Conrad Kongkal Sangma hynne ka sngi Balang ula ong ba ka Sorkar kan sa shim ia ka sienjam ban leh eiei pyrshah ia kito ki briew kiba donkti ha ka jingpyniaid ia ki trok ba kit beain ia u dewiong.
“….baroh kito ki briew kiba la shah kem (ha kine ki kam beain) ngin sa ai jingpynshitom ia ki” ong u Conrad haba iakren bad ki nongthoh khubor haba jubab ia ka jingkylli halor ka jingdon jong ka kynhun “high Level” kaba pyniaid ia ki trok kit dewiong be-ain ha Jylla.
Ka seng HITO kala ujor da ka ejahar ha Mawryngkneng Police Station pyrshah ia ki 18 tylli ki trok kit dewiong ba beain bad kam ba “Bun na ki nongniah jong kine ki trok kila kam ba kila ioh jingbit ban iaid na kane ka kynhun “high Level”.
Haba kylli la ka Sorkar kan pynshitom ia kine ki briew kiba don ha lyndet ka “High Level”,u Conrad ula ong ba ka Sorkar jong u ka dei kaba pyrkhing bha haba phai sha ki jingpynshitom ia kino kino ki kam beain.
“Nga la kren shai naduh ka sngi ba nyngkongba kino kino kiba jia ki dei ban long da ka lynti, da ka ain bad kiba don ki kot ki sla bad ngi iengskhem halor kane. Ngi la ju pynshitom bad nga la ju pynsngew naduh ka sngi ba nyngkong ba kane ka Sorkar kan leh tyngeh ia kino kino kiba pyniaid beain ia u dewiong”.
Haba pynpaw ba ki don shibun ki bor kiba khmih ia ka jingiaid ki trok dewiong, u Myntri Rangbah ula ong “Ka jingkylli ba kum kine ki jingjia ki jia kin ym don satia namar kumba nga ong, ki don shibun ki bor ba khmih hynrei ngim lah ruh ban kyntait ba kin don ki briew kiba pyrshang ban iaid lait bad haba ki shah kem, kin ai ia ki daw. Hynrei ha kiba bun ki case, phi la iohi ba palat 100 na ka 1000 tylli ki kali kila shah kem bad bun ngut ruh ki briew kila shah kem”.
“Tang namar ba ka don ka Ain ba pyrshah ia ki kam pyniap briew kam mut satia ba ka jingpyniap briew kan ym jia shuh hynrei ka ain ka don ba pynthikna ba kiba pynkhein kin ioh ia ka jingpynsajia” ula ong.
