Shillong, Nailar 07 : U Myntri Rangbah ka Jylla Conrad K Sangma ula pynthikna ia ka jingkular ka Sorkar ban iakren bad ki paidbah bad pynbeit ia ki jingsngewkhia jong ki hashuwa ban rai pyniaid shakhmat bad ka jingpyntreikam ia ka project lynti rel ha ki lai tylli ki thain jong ka Jylla.
Ula kyntu ruh ia baroh ki seng sain pyrthei ban kylla noh ia ka jingmut jingpyrkhat bad ban wan shakhmat ban iakren ia ka kam lynti rel ha ka jingialang ban wan jong ka All Party Committee on Railway bala thaw da ka Sorkar.
“Nga la kren shai bha ba haba phai sha ka jingkiew ka ioh ka kot, ka lynti rel ka long kaba kongsan bha ia ngi la ka dei ha Khasi Hills, Jaintia Hills ne Garo Hills. Nga la shai bha ha ka jingpyrkhat jong nga ba ka long kongsan bha. Ngi donkam ia ka hynrei ha kajuh ka por, nga la kren shai ba ka dei ka kam kaba jyrwit jyrwat bad ba don shibun ki jingpynsngew na ki paidbah” ong u Conrad haba iakren bad ki nongthoh khubor haba jubab ia ka jingkylli la ka Sorkar kan bteng ban buddien ha kaban wanrah ia ka lynti rel ha Jylla.
“Hooid, ki Myntri jong ngi kila wan shakhamt bad kila ong ba ka dei ban jia hynrei nga la kren shai ia ka lynti treikam jong nga ba ngin shim lang ia ki shnong ki thaw bad ki paidbah ha ka rai ba ngi shim watla ka dei ha Garo Hills bad Khasi Hills, ngin sa iakren bad ki paidbah, ngin sa iakren ia ki bad ngin pyrshang ban pynkohnguh ia ki bad lada don kino kino ki jingsngewkhia bad ki jingeh, ngin sa pyrshang ban pynbeit ia ki” ula bynrap.
La ka kam survey ia ka jingtyrwa ban pynpoi lynti rel kala sdang ha South Garo Hills, u Myntri Rangbah ula ong “Em, kim pat leh”.
Hynrei ula pyntip ba u Myntri ka Sorkar Pdeng ula kylli ba ka long ne em kaba lah ban pyntrei ia ka project lynti rel ha kiwei pat ki jaka ka Jylla lada kam wan ha Khasi Hills.
“Nga la ong ha u (Myntri ka Sorkar Pdeng) ba nga la iakren bad ki nongmihkhmat ka Garo Hills bad Jaintia Hills bad kila pyni iaka dak kaba sngewtynnad bad halor ka jingpynpaw jong ki,nga la kren ia ki ba ngi kwah ban ioh lang ia ka jingmynjur u paidbah, ki sengbhalang bad kiwei kiwei” bynrap u Conrad.
Haba kylli halor ka Committee on Railway, u Myntri Rangbah ula ong “Sa shisien nga kyrpad ba ki seng sain pyrthei bapher bapher ki dei ban wan iakren bad ngi. Kane ka dei ka rukom treikam ka riti synshar paidbah bad ka Sorkar kala ai ha ki ia ka rynsan. Namar kata, ngi dei ban wan shakhmat ban iakren”.
“Ngi la khot ia ki briew ba kin wan hynrei don katto katne ki seng sain pyrthei kiba kyntait bad mynta, ngi kum pyrkhat la kine kijuh ki briew kiba ong ba dei ban don ka Committee mynta ki ong pat ba kim kwah ban iadonbynta ha ka Committee…ngan tip shuh kaei ka jingthmu jong ki haba ki kren ia kane ka kam hapoh ka Iingdorbar Thaw Ain. Hynrei long kat kaba long, ngi la rai ban pyniaid shakhmat ia ka jingialang kampher katno tylli ki seng sain pyrthei ki wan” ula ong.
