Shillong, Naiwieng 27 : U Myntri Rangbah bad National President ka NPP Conrad K Sangma ha ka sngi Balang, ula kren shai ba ka NPP kan dang iai bteng ban iatreilang bad ki paralok ha ka MDA ban wanrah ia ka jingskhem jong ka Sorkar.
Haba iaren bad ki lad pathai khubor, u Conrad ula ong “Haba kren halor ka jingdon nombor, hooid ngi kmen palat ba ka NPP mynta kala don 32 ngut ki MLA bad lada ngam bakla, ka dei tang hadien ka APHLC ba ia une u nombor la ioh biang da ka party. Namar kata, ngi sngewnguh palat bad ngi sngew nguh ia ki paidbah halor ka jingshaniah ba kila ai sha ngi”.
“Ngi la kren shai naduh ka sngi kaba nyngkong ba kum ka party, kum ka kynhun synrop bad kum u Myntri Rangbah, ngi la wan hangne ban phah ia ka khubor kaba sngewtynnad sha ki paidbah ka Jylla- Ka kam sain pyrthei ka dei kaba jyrwit jyrwat bha bad ki don shibun kiei kiei kiba wan sha ngi hynrei haba kut nga sngew b aka khubor ka jingskhem bad ka khubor ka jingshaniah bad ka khubor ka jingsngewskhem ka long kongsan ruh ha ka kam sain pyrthei bad watla ngi la don u nombor ban synshar marwei, ngin iai bteng ban iatreilang bad ki paralok. Ngi la pyni ia ka jingshaniah ha ki, kila pyni ia ka jingshaniah ha ngi bad ngi kwah ban iohi ba ngin iatreilang na ka bynta ka jingskhem ka synshar khadar hapoh ka Jylla” ula ong.
“Hooid, ki lah ban don ki jingtynjuh hapoh ka kynhun synrop. Ki lah ban mih ki jingsngew iapher hapdeng ki seng sain pyrthei, ngi lah ban nym mynjur ia shibun kiei kiei kiba ngi kwah ban leh hynrei kane ka dei ka rukom long ha ka kynhun synrop bad kam sain pyrthei hynrei haba kut, kaei kaba ngi mynjur ka long ba ngi dei ban iatreulang da ka jingaiti lut na ka bynta ka roi ka par jong ka Jylla” ula bynrap.
Nalor kane, u Conrad ula ong ba baroh ki MLA ka NPP kila kmen bha halor ka result bad kam shym la don satia ka jingpynbor ia u ban pynkiew ia ka jingdon ki Myntri Sorkar na ka party.
Haba ai khublei ia ki paidbah ka Gambegre halor ka jingkyrshan bad ai ka jingshaniah ha ka elekshon shiteng samoi ba dang shu dep,u Conrad ula ong “Kane ka constituency ka lah ban dei kawei na ki constituency kaba tasam bha ia ngi khamtam ha ka thain Ri-lum Garo namar ha ki saw tylli ki elekshon bala dep, ngim pat ju jop na kane ka constituency bad ngi ju poi beit ha ka kyrdan kaba lai”.
“Ka dei ka elekshon kaba jwat bha hynrei nga sngewnguh ia baroh namar ka jingkyrshan bad pynlong ia ngi ban jop ia ka elekshon” ula bynrap.
