Shillong, Risaw 29: U Myntri Rangbah ka jylla Conrad K. Sangma ha ka sngi Balang, ula ong ba ka sorkar kala rai ban pynsangeh noh ia ka jingthmu ban pyniaid ia ka Tura Medical College da ka PPP mode.
“Ngin sa khmih bniah ia kiwei pat ki lad, kumno ba ngin lah ban pyntreikam noh ia ka college” ula ong.
Ula pyntip ba ka sorkar kala shim ia ka rai namar ba kila don ki jingsngewkhia bad ki jingpynpaw jong ki katto katne tylli ki kynhun halor ka jingtyrwa ban pyniaid ia katei ka college da ka kynhun shimet.
Ula pynshai ba ka sorkar kala tyrwa da ka PPP mode ban pyniaid ia ka Tura Medical College namar ka jingeh ha kaba iadei bad ka jingbym don ia ki riewstad ne ki briew kiba la tbit bha ha ka kam.
“Ngi lah tyrwa ia ka PPP mode kum ka lad ban sdang ia ka medical college ha Tura. Hynrei namar kiba bun ki kynhun kila pyrshah jur ia katei ka jingthmu, ngi lah rai ban shim ia ki jingsngew bad ia ki jingai jingmut ki jongki. Ngin sa shimkhia lang bad baroh kiba don bynta lang ryngkat bad ki paidbah bad wad ia ki lad ki lynti kumno ba ngin lah ban pyniaid noh ia ka medical college” ula ong.
Ula pynpaw ruh ba ka sorkar ka iengskhem ha ka jingmut ban pynthikna ba ka Tura Medical College kan long ka jaka pule kaba kyrpang bad kaba kongsan bha.
