Shillong, Nohprah 21 : Ki Pulit ka East Jaintia Hills kila pynthikna ba dei ka HNLC kaba pynbthei bomb IED ha ka jaka treikam ka Dhar Company ha Shymplong, East Jaintia Hills bad kila ioh kurup ruh ia katto katne ki tiar shna bomb na kawei ka Iingsah ha Shymplong.
Ki Pulit kila kem ia arngut ki briew halor kane ka jingbthei bomb kiba la phla ia ka jingdonkti. Kine ki arngut ki kyrteng u Richard Suchen ba 31 snem bad u Pynshaitbor Syih ba 45 snem, kiba dei hi ki nongshongshnong ka Shymplong.
Ki Pulit ki iathuh ba kane ka jingpynbthei bomb kala jia ha ka por 12:15 baje mynstep jong ka 15 tarik Nohprah. Ia kane ka jingjia la ujor ejahar ha Lumshnong Police Station. Kane ka jingpynbthei bomb kala pynjulor ia kawei ka trok kit um ba don ha phyllaw bad ym shym la don satia mano mano ba iap kumba kam ka HNLC.
Ha ka jingtohkit ia kine ki arngut kiba shah kem, la iathuh ba ia kane ka jingpynbthei bomb la suhbuit bad pyntreikam da u Smiki Tongper jong ka Shnong Shymplong ha ryngkat bad kine ki arngut lem bad uwei u dkhot ka seng HNLC u bym pat tip kyrteng.
Ha ka jingkhynra ia ka Iingsah u Tongper bad sawdong ka phyllaw, ki Pulit kila ioh kurup ia ki tiar shna bomb ba kynthup ia ki safety fuse, detonator, bakhor, ki nar jot, ka suloi shna hi, ki waiar less bad kiwei kiwei.
Ki Pulit ki iathuh ba u Tongper u dei ruh uba shah kynnoh donkti ha kawei pat ka case bala register ha Khliehriat Women Police Station hapoh ka kyndon IPC bad ka POCSO Act.
Ia kane ka case la register hapoh ki kyndon ka Bharatiya Nyaya Sanhita bad ka Explosive Substances Act bad ka jingtohkit mynta kala iaid shaid shaid ban lah ithuh bad ioh kem ia kiwei pat ki briew kiba donkti.
Ki Pulit kila kyntu ia ki paidbah ba kin ai lem ia ki jingtip ba iadei bad kane ka jingjia, haba kular ba kin sa buhrieh ia ka kyrteng bad sa ai buskit ruh ia ki nongai jingtip.
