Pynthikna ka UDP ban kyrshan ia ka Sorkar MDA haduh ba kut ka samoi

Shillong, Naitung 08 : U President ka United Democratic Party (UDP) Bah Metbah Lyngdoh ha ka sngi Nyngkong, ula pyntip ba ka party jong u kan iai bteng ban kyrshan ia ka Sorkar MDA ba ialam da ka NPP haduh ba kut ka samoi treikam.

Ha kajuh ka por, ula ban jur ba ka Regional Democratic Alliance (RDA), ka kynhun synrop jong ka UDP bad ka HSPDP, ka dang skhem beit triang.

Haba iakren bad ki nongthoh khubor, u President ka UDP ula pynpaw ia ka jinglyngngoh halor ki khubor ba kynnoh ba ka UDP kan sa mih noh na ka Sorkar MDA.

“Kaei kaba nga kren mynta ka dei kaba nga kren na ka bynta ka party. Ha ka UDP hi, kam shym la don ka jingiakren haba iadei bad ka jingmih noh. Ngin iai bteng ban don bad ka Sorkar bad kumba long mynta, kam pat shym don ka jingiakren ne iasyllok ba kum kane hapoh ka party” ula ong.

U Bah Metbah ula kyntait ruh ia ka jingkynnoh ba ka jingbym lah lehbha jong ka party ha ka elekshon Lok Sabha ba dang shu dep ka dei namar ba ka UDP ka iatreilang bad ka NPP.

Ha ka jingshisha, ki paidbah ki kmen ia ka jingtreikam ka UDP ha ka Sorkar MDA-I bad nang pynjop ia ka party da 12 ngut ki MLA ha u 2023.

Hynrei haba kylli la ka VPP ka dei ka jingma ia ki seng riewlum ha Jylla, u Bah Metbah ula ong “ Ngam tip satia..ai ba u paidbah un rai. Haba iadei hi bad ka party, ka jingsngew jong nga bad jong baroh ki nongialam hapoh ka party, ka long ba ngi kwah ban iohi ba ngin ioh ia ka jingjop ha ka elekshon MDC”.

“Ngam iohi satia ba ka VPP kan dei ka jingma. Kaei kaba ngam lah ban ong mynta ka long ia kaei ka daw hynrei shisien ba ngi la leit biang sha ki paidbah, ngin sa pynshai sha ki, kaei ka jingsngew artatien ba ki don” ula bynrap.

Halor ka jingdon ki katto katne ki MDC ba sheptieng ban iakhun ia ka elekshon MDC, u bah Metbah ula ong “…Ngi la dei ban shim ia ka kum ka jingtynjuh lada phi dei shisha ki riew iakhun”.

Ha kajuh ka por, une u Khliehduh ka UDP ula ban jur ba ka RDA ka dang skhem bad kam shym la don satia kano kano ka jingiaphoi hapdeng ka UDP bad ka HSPDP.

Ula kynthoh ia kane halor ka jingkren ba dang shen jong u Working President ka party Bah Paul Lyngdoh ba ong ba ka HSPDP ka lah ban mih noh na ka RDA hadien ka jingliem ha ka elekshon Lok Sabha.