Shillong, Nohprah 18 : U Myntri kam Pohiing Amit Shah hynne ka sngi U Blei ula ong ba ka song pisa bala mang mynshuwa sha ka thain Shatei Lam Mihngi kam ju poi satia sha ki Shnong ki Thaw hynrei hadien ka jingshim u Narendra Modi kum u Myntri Rangbah Duh, ka song pisa kala poi sha ki shnong bad la pyndonkam ia ka sha ki kam pynroi bad kane ka dei ka jingjop kaba khraw eh.
Haba iashimbynta ha ka jingrakhe jubili ksiar jong ka North Eastern Council (NEC) u Amit Shah ula ong ba ha ka jingialang ba dang shen jong ka NEC bala pyniaid da u Myntri Rangbah Duh, u Mytri Rangbah um sym la iaroh tang ia ka jingtreikam jong ka NEC ha kine ki 50 snem hynrei ula bthah ruh ban pynkhreh ia ka blueprint jong baroh ki jait kam pynroi na ka bynta ka thain Shatei Lam Mihngi na ka bynta ki 25 snem ban wan bad ban buh ruh ia ka thong ba thikna.
Haba pynpaw ba u Myntri Rangbah Duh ula ju buh beit hakhmat ia ka thain Shatei Lam Mihngi, ula ong ba u Myntri Rangbah Duh ula wan iuhkjat la palat 50 sien ha kane ka thain tang hakine ki 8 snem bala leit noh katba ki Ministry kila dep ban wan palat ia ka 400 sien.
Une u Myntri kam Pohiing ula ong ruh ba mynshuwa ki kam pynroi jong ka thain kila sahkut namar ka jingduna palat ka mang tyngka bala ai sha ka NEC hynrei u Myntri Rangbah Duh ula saindur thymmai bad ula ai ia ka lynti ba thymmai ban wanrah ia ki jingtei bapher bapher ha ka thain lyngba ki project kiba khmih hi na Delhi.
Ula ong ba dei namar ka jingnang biang ki jingtei, ka kam jngohkai kala nang kiew ha ka thain Shatei Lam Mihngi bad ruh ka jingnang mih ki karkhana rit, ki jaka pule bad kiwei kiwie. U ong ba u Myntri Rangbah Duh ula wanrah ruh ia ka project ban pyniasoh ia man ki Nongbah jong ka thain Shatei Lam Mihngi da ka surok, ka lynti rel bad ka liengsuin.
U Amit Shah u ong ba dei namar ka jinglong nongialam jong u Myntri Rangbah Duh, ka thain Shatei Lam Mihngi kala lait mynta na baroh ki jingiakajia bad la lah ban wanrah ia ka jingsuk ha ka thain.
Kat haduh phra snem mynshuwa, ka thain Shatei Lam Mihngi ka dei kaba la bna nam halor ka jingpynlong ia ki pakhang shnong, ki pakhang ophis, ka jingpynbthei bomb, jingiather kuli bad ki briew kane ka thain kim lah satia ban imsuk namar ki kam pyntriem jong ki kynhun kaikhlaw bapher bapher.
Ha kine ki phra snem, kala hiar haduh 74% ki kam kaikhlaw, 60% ka jingduna ha ka jinghiar thma ia ki kynhun pahaea bad 89% ha ka jingiap jong ki riew paidbah katba 8000 ngut ki samla kila wan ban pyndem wait ban im lang noh ha ka imlang sahlang.
U Amit Shah ula ong ba kine ki dei ki jingjop kiba la wan urlong namar ka jinglong nongialam jong u Myntri Rangbah Duh Narendra Modi haba ong ruh ba khlem ka jingsuk hi, ka long kaba eh ban wanrah ia ki kam pynroi.
U Amit Shah ula ong ba ha ka samoi treikam jong u Myntri Rangbah Duh Narendra Modi, la iasoi ia ka soskular iasuk bad ka NLFT ha u 2019, ka soskular bad ka Bru bad Bodo ha u 2020, ka soskular bad ki Karbi ha u 2021.
U ong ba ka jingiashrut khappud hapdeng ka Meghalaya-Assam bad ka Assam-Arunachal kala jan kut artad bad namar ka jingwanrah pat ia ka jingsuk, ka thain shatei lam mihngi kala iiadf mynta ha ka lynti jong ka roi ka par.
Ka nuksa kaba biang eh ia kane ka long ba ha kip or bala leit noh kila ju mih ki jingdawa ban weng noh ia ka AFSPA na ka thain hynrei mynta ka jingdawa kam mih shuh hynrei ka Sorkar India hi kala shim ia ka sienjam ban weng noh ia kane ka ain. Ula ong ba mynta tang 60% ki jaka ka Assam, 7 tylli ki District ka Nagaland, 15 tylli ki Police Station ha ki 6 District ka Manipur bad Tripura bad Meghalaya kila lait n aka AFSPA katba tang kawei ka District ha Arunachal ka dang ap ban weng noh ia ka AFSPA.
U Myntri kam Pohiing ula pynpaw ia ka jingsngewskhem ba ka NEC bad ki Myntri Rangbah jong ki Jylla ka thain kin iatrei da ka jingaiti lut ban pynurlong ia ka thong bala buh ia ka NEC da u Myntri Rangbah Duh, kata ban iarap kyntiew ia ka thain bad ban iarap thaw lad ia ka roi ka par, ka jingsuk, ka iohkam iohjam, ka thain kaba riewspah kum kiwei pat ki thain jong ka Ri.
