Shillong, Naitung 07 : U Nongaiktien ka Sorkar bad Myntri ki kam Jngohkai Bah Paul Lyngdoh ha ka sngi Nyngkong, ula ong ba ka Sorkar kala iengskhem ha ka nongrim ban pyntreikam ia ka jingbuhbor ba 22 tarik Naitung ha kaban pynkynriah ia ki dukan madan na ka thain Khyndailad.
U Bah Paul ula pynpaw ia ka jingsngewskhem ban iohi ba ki nongshong dukan madan kin bud ryntih ia ki jingbthah, haba kdew ia ka jingbiang ki bor ban pyntreikam ia ka hukum bad ka jingkhlain jong ka mukotduma hadien ba pynmih hukum daka Iingkashari Meghalaya High Court.
Haba kren sha ki lad pathai khubor, u Myntri ula ong “Ka Sorkar ka khmih lynti ba kin bud ryntih pura ia ka hukum ban pynkynriah ia ki dukan madan hapoh ka 22 tarik Naitung. Ngi don ia ki bor kiba khlain bad ruh ka hukum ka Iingkashari kala nang pynkhlain ia ka case jong ngi bad hapoh ka 22 tarik Naitung, ngi khmih lynti ba baroh ki nongshong dukan madan kin bud ryntih. Baroh kiei kiei yn sa pyndep lut ha kane ka sngi”.
U Bah Paul ula kren ruh halor ki jingthmu ka Sorkar ban pynlong ia ka Khyndai lad kum ka jaka iaid kjat ki briew, kynthup ia ka bynta na Khyndailad sha Jail Road bad Umsohsun, ha ryngkat ka jingpyn itynnad ia ka jaka. U ong ba ki nongshongshnong ka thain kin ioh da ka pass ba pyrrkhing ia ka jingiaid kali.
Ka bynta ba nyngkong jong ka project kala nang iaid shakhmat bad ka Meghalaya Urban Development Authority (MUDA) kala dep pynkhrehia ki plan baroh.
“Kan don ka jingpynitynnad. Kan long noh ka jaka iaid kjat ki briew bad tang kito kiba sah ha katei ka jaka kin ioh ia ka pass, ka ban shah ia ki ba kin poi sha la Iing, kata ruh kan ym long satia baroh shisngi. Ngin da buh ia ka por rung bad ka por mih” ula ong.
Haba kylli, u Bah Paul ula ong “Ka MUDA kala don. Baroh kiei kiei kila don lut. Kane ka dei ka bynta ba nyngkong. Shisien b aka seisoh ha bynta ba nyngkong, ngin sa nang pyniaid pat ia ki bynta kiba sah”.
Ki nongshong dukan madan kiba mynjur ban pynkynriah ia ki dukan kin ioh ia kasong pisa ba T.20,000 ba kynthup ia ka jingsiew lypa ba T.10,000 bad ka jingsiew ba T.2000 manla u bnai na ka bynta san bnai.
U Bah Paul ula ban jur ba ka Sorkar Jylla kala ailad bha ia baroh bad kala aipor ia ki nongshong dukan la palat shisnem ba kin pynkynriah ia ki dukan.
“Ngi la leh kham bun ban ia kaba kano kano ka Sorkar kan leh. Ngi lah iaid lait ia ka lynti iaid, kynshew ha ka jaka ba lait bad aipor ia ki ia palat shisnem ba kin pynkynriah ia ki dukan. Ngi la leh hok bha” ula ong.
